पाल्पा उद्योग वाणिज्य संघले आब्हान गरेको पाल्पा बन्दले जनजीवन प्रभावित भएको छ । पत्रकार कुटपिटको आरोपमा पक्राउ परेका व्यवसायीलाई छाड्न माग गर्दे शनिबारदेखि भएको बन्दका कारण तानसेन बजार क्षेत्रका पसलहरु खुलेका छैनन् । तानसेनबाट छुट्ने र बाहिरबाट तानसेन भित्रिने गाडी समेत नचलेको जिल्ला प्रहरी कार्यालय, पाल्पाले जनाएको छ ।
पत्रकार महासंघ पाल्पा शाखा अध्यक्ष राजेश कुमार अर्याल र शाखा सदस्य विजय बौडेलमाथि कुटपिट गरेको आरोपमा बावुराम विष्ट, शैलेन्द्र भट्टराई र लक्ष्मण रेग्मीलाई शुक्रबार नै पक्राउ गरी अनुसन्धान भैरहेको प्रहरीले जनाएको छ ।
तानसेन नगरपालिकाले गएको फागुन १५ गते तानसेनको होलाङदीदेखि ढुंगाखानी सडक केन्द्रदेखि दायाँबायाँ १०–१० मिटर चौडा पार्ने निर्णयको विरुद्ध घरधनीहरुले नगरपालिका कार्यालयमा धर्ना दिने क्रममा पत्रकारमाथि कुटपिट भएको हो ।
