प्रदेश सांसद चेतनारायण आचार्यले शहरी क्षेत्रमा आर्थिक व्यवस्थापन गरेका व्यक्तिहरु मिलेर पहाडी क्षेत्रका सामुहिक लगानी गर्नसके ठूलो सफलता मिल्ने बताउनु भएको छ । डिभर्ना अर्घाखांची रुपन्देही सम्पर्क समाजले संचालन गर्न लागेको एम्बुलेन्स उद्घाटन कार्यक्रममा बोल्दै सांसद आचार्यले सरकारले पहाडी क्षेत्रमा विकासका लागि धेरै लगानी गरेपनि त्यसको सदुपयोग गर्न नसकिएको बताउनु भयो । उहाले अध्ययन, आर्थिक व्यवस्थापन तथा अन्य सेवामा जन्मभूमि छाडेर बाहिर बसेका समूहको सामुहिक लगानीको सोंच अहिलेको आवश्यकता रहेकोमा जोड दिदै सरकारले गरेको लगानी सदुपयोग गर्न र आफ्नो जन्मभूमिलाई उर्भरा बनाउन हरेक व्यक्तिले कमाएको केही प्रतिशत लगानी छुट्टाउन आग्रह गर्नुभयो ।
शहरी क्षेत्रमा रहेर गाउंको विकासका लागि योजना बनाउन विभिन्न सामाजिक संस्थाहरुको लागेर केही सजिलो भएको बताउंदै उहाले त्यसको व्यवस्थापन गर्न आफू लागिपर्ने प्रतिवद्धता जनाउनु भयो । कुलविक्रम खनालको सभापतित्व र हरि आचार्यको सञ्चालनमा भएको कार्यक्रममा बुटवल उपमहानगर वार्ड नं १३ का अध्यक्ष नारायण पुन, सल्लाहकार देवीकुमार श्रेष्ठलगायतले बोल्नु भएकोथियो । सो अवसरमा एम्बुलेन्स संचालनका लागि सहयोग गर्ने विभिन्न दाताहरुलाई सम्मान गरिएको थियो । विभिन्न सहयोगी तथा आफ्नै स्रोत व्यवस्थापन गरेर एम्बुलेन्स शुरु गरिएको सल्लाहकार देवी श्रेष्ठले बताउनु भयो ।
