नवलपरासी ।
प्रदेश नं ५ का मुख्यमन्त्री शङ्कर पोखरेलले कृषिको आधुनिकीकरण र व्यावसायिकरणमा योगदान गर्न निजी क्षेत्रलाई आह्वान गर्नु भएको छ ।
नेपाल उद्योग वाणिज्य महासङ्घ प्रदेश नं ५ को दोस्रो वार्षिक साधारणसभालाई परासीमा सम्बोधन गर्दै मुख्यमन्त्री पोखरेलले मुलुकको आर्थिक समृद्धिको सुरुवाद कृषिबाट हुने उल्लेख गर्दै कृषि क्षेत्रमा लगानी गर्न निजी क्षेत्रलाइ आह्वान गर्नु भएको हो ।
उहाले भन्नुभयो “प्रदेश सरकारले कृषिको सुधारबाटै समृद्धि सम्भव छ भन्ने मान्यता लिएको छ, कृषिको सुधारका लागि सहज पनि छैन तर निजी क्षेत्रको लगानी आवश्यक छ, कृषिको व्यावसायिकरण, आधुनिकीकरण र बजारीकरणमा तपाईसँग हामी हातेमालो गर्न चाहन्छौँ ।”
निजी क्षेत्रको सहयोगबाटै समृद्धि हासिल गर्न सकिने भन्दै निजी क्षेत्रप्रतिको सरकारको दृष्टिकोण सकरात्मक रहेकोले शङ्का नगर्न पनि आग्रह गर्नुभयो ।
भौतिक पूर्वाधार विकास मन्त्री बैजनाथ चौधरीले प्रदेश सरकारले निजी क्षेत्रको सहभागितालाई उच्च प्राथमिकतामा राखेको बताउँदै उहाले भन्नुभयो, “आगामी पाँच वर्ष भित्रमा ९.५ प्रतिशत आर्थिक वृद्धिदर हासिल गर्न र गरीबीको दरलाई दश प्रतिशतमा झार्ने गरी प्रदेश सरकारले आवधिक योजना बनाएको छ, त्यसमा रु ११ खर्ब ९८ अर्ब लगानी चाहिन्छ, निजी क्षेत्रबाट मात्रै ६२.६ प्रतिशत लगानी हुने हामीले विश्वास लिएका छौँ ।”
मन्त्री चौधरीले भैरहवामा निर्माणाधिन बिमानस्थल सञ्चालनमा आएपछि आउने पर्यटकको आवासका लागि प्रयाप्त होटल नरहेकाले त्यस क्षेत्रमा लगानी गरी लाभान्वित हुन निजी क्षेत्रलाई आग्रह गनुभयो ।
नेपाल उद्योग वाणिज्य महासङ्घका वरिष्ठ उपाध्यक्ष शेखर गोल्छाले सरकारले निजी क्षेत्रलाई उत्साहित बनाउँदै लगानीको लागि अभिप्रेरित गर्नुपर्नेमा जोड दिनुभयो ।
महासंघका प्रदेश अध्यक्ष गुणनिधी तिवारीले प्रदेश ५ का आर्थिक सुचकहरु सकारात्मक रहेको र यहा लगानीको सम्भावना तुलनात्मक रुपमा राम्रो रहेको बताउनु भयो ।
नवलपरासी उद्योग वाणिज्य संघका अध्यक्ष केशव भण्डारीले महेशपुर भन्सारको स्तरोन्तीले नवलपरासीको आर्थिक बिकास अघि बढेपनि फटको मार्न नसकेको बताउनु भयो ।
महासंघका प्रदेश अध्यक्ष गणनिधि तिवारीको अध्यक्षता र उपाध्यक्ष दीपक पौडेलको धन्यवादमा उदघाटन कार्यक्र भएको थियो ।
साधारण सभामा कोषाध्यक्ष मोहन श्रेष्ठले आर्थिक र कार्यसमिति सदस्य कृष्ण कुमार श्रेष्ठले बार्षिक प्रतिवेदन पेश गर्नु भएको थियो ।
