बुटवल,२०७६ बैशाख २५ बुधबार
रुपन्देहीको सालझण्डीबाट पाल्पाको जुठापौवा सुगुरढुंगा सडक बिस्तार सुरु भएको छ ।
कृषि सडकका रुपमा ट्रयाक मात्रै खुलेको सडकलाई अहिले मोटरबाटो गुड्ने गरी बिस्तार गरिएको छ ।
मोटरबाटो र कालोपत्रेको आज प्रदेश ५ का भौतिक पुर्वाधार विकास मन्त्री चौधरीले उद्घाटन गर्नुभयो । उहाले कृषिको बजारिकरण तथा ग्रामिण पर्यटनको प्रवद्धनमा सघाउ पुग्ने भएकाले सम्भावित रणनैतिक सडक अन्तरगत विस्तार र स्तरोन्नति थालिएको बताउनुभयो ।
सडक राजमार्ग क्षेत्रबाट २६ किलोमिटर लम्बाइको छ । त्यसलाई साढे ६ मिटर चौडाइको बनाइएको छ । पूर्वपश्चिम राजमार्ग अन्तरगत रुपन्देहीको सालझण्डीबाट सुरु भएर पाल्पाको रैनादेवी छहरा गाउपालिका र अर्घाखाचीको पाणिनी गाउपालिका हुदै गुल्मीको रुरु गाउपालिकामा जोडिने छ ।
प्रदेश सांसद भुमिश्वर ढकालले लुम्बिनी आउने पर्यटकलाई ग्रामिण क्षेत्रमा लगेर घुमाउन र बसाइ अवधी बढाउन समेत सडक उपयोग गर्ने बताउनुभयो । प्रदेश सांसद नारायण आचार्यले कृषि उत्पादन बजार ल्याउने सडक भएकाले विस्तारलाई प्राथमिकता दिइएको बताउनुभयो ।
