जेष्ठ २८, विश्वकप क्रिकेट अन्तर्गत आज बंगलादेश र श्रीलंकाबीच खेल हुनेछ । व्रिस्टलमा हुने यी दुई टोलीबीचको खेल दिउँसो सवा ३ बजेबाट सुरु हुनेछ । आजको खेलमा दुवै टोली सहज जितको खोजीमा मैदान उत्रनेछ । दुवै टिम जित निकाल्दै शीर्ष चारको सम्भावना कायम राख्न चाहन्छ । श्रीलंकाविरुद्ध बंगलादेश दोस्रो जितको खोजीमा हुनेछ ।
अघिल्ला तीन खेलमा एक जित र दुई व्यहोरेको बंगलादेश २ अङ्क सहित आठौं स्थानमा रहेको छ । अघिल्ला ३ खेलमा एक जित, एक हार र एक बराबरी खेलेको श्रीलंकाको ३ अङ्क सहित छैटौं स्थानमा रहेको छ ।
यसअघि हिजो भएको खेल वर्षाका कारण स्थगित हुँदा दक्षिण अफ्रीका र वेष्ट इण्डिजले अङ्क बाडेका छन् । साउथह्याम्पटनमा भएको खेल वर्षाका कारण स्थगित भएपछि दुवै टोलीले अङ्क बाडेका हुन् । टस हारेर दक्षिण अफ्रीकाले ब्याटिङ गरिरहदा पानी परेपछि खेल रोकिएको थियो । खेल रोकिनुअघि दक्षिण अफ्रीकाले ७ ओभर ३ बलमा २ विकेट गुमाएर २९ रन जोडेको थियो ।
यो खेलसँगै वेष्ट इण्डिजले ३ खेलबाट ३ अङ्क जोडेको छ । दक्षिण अफ्रीकाले भने ४ खेलपछि पहिलो अङ्क जोडेको छ । यसअघि दक्षिण अफ्रीकाले अघिल्ला ३ खेलमा लगातार हार व्यहोरेको थियो ।
