असार ७- काठमाडौ,
सत्तारुढ दल नेपाल कम्युनिस्ट पार्टी ९नेकपा० सचिवालयको बैठक एजेन्डामै प्रवेश नगरी सकिएको छ ।
पार्टीको राजनीतिक प्रतिवेदन र एकता बाँकी रहेका विषयमा छलफल गर्न शनिबार प्रधानमन्त्री निवास बालुवाटारमा बसेको बैठकमा प्रधानमन्त्रीको युरोप भ्रमण र समसामयिक राजनीतिक घटनाक्रमका विषयमामात्र छलफल गरेर बैठक टुंगिएको हो ।
तत्कालीन नेकपा एमाले र माओवादी केन्द्रबीच पार्टी एकता भएको १३ महिना पूरा भइसक्दा पनि अझै पार्टीको राजनीतिक प्रतिवेदन आउन सकेको छैन ।
यस्तै, पार्टीको सांगठनिक एकताले पनि पूर्णता पाउन सकेको छैन ।पार्टीभित्रको विवादका कारण नेकपामा अहिलेपनि जिल्ला इन्चार्ज र सहइन्चार्जको टुंगो लाग्न सकेको छैन ।यस्तै, विभागहरु गठन र केन्द्रीय सदस्यहरुको जिम्मेवारीको बाँडफाँट पनि अधुरो नै छ ।
