गुल्मी ,
असार २२ –
गुल्मीको धुर्कोट गाउँपालिका वडा नम्बर ५ को वस्तुमा दिवा सेवा केन्द्र खुलेको छ ।
प्रदेश नं ५ को सामाजिक विकास मन्त्रालय र धुर्कोट गाउँपालिकाको आर्थिक सहयोग तथा जनविकास केन्द्रको समन्वयमा सेवाकेन्द्र सञ्चालन गरिएको धुर्कोट गाउँपालिका प्रमुख भुपाल पोख्रेलले बताउनुभयो ।
बुढेसकालमा बुढा–बुढीलाई समय बिताउन सजिलो होस भनेर दिवा सेवा केन्द्र खुलाइएको हो ।
सेवा केन्द्र सञ्चालनमा आएपछि ज्येष्ठ नागरिक खुसी छन् ।
दिवा सेवा केन्द्रमा बृद्धबृद्धालले मनोरञ्जन सँगै दैनिक विभिन्न प्रकारका खाजा समेत खाने गरेका छन् ।
दैनिक भजन कृतन गर्ने र फलफुल वितरण गरिने केन्द्रका सञ्चालन समितिका कार्यवहाक अध्यक्ष माधव भण्डारीले बताउनुभयो । बृद्धबृद्धाहरुलाई केरा, स्याउ, मिठाई लगायतका दैनिक फरक–फरक खाजा प्रदान गर्ने पनि भण्डारीले जानकारी दिनुभयो ।
दिवा सेवा केन्द्र २ महिनाको लागि सञ्चालन गरिएको हो ।
जेठ र असार गरी दुई महिनासम्म दिवा सेवा केन्द्र सञ्चालन हुनेछ । केन्द्रमा २०७३ सालदेखि नै औसीँका दिन भजन कृतन हुने गरेपनि १ जेठबाट दैनिक भजन कृतन सुरु गरिएको थियो ।
अहिले दैनिक २० देखि ३० जनासम्म जेष्ठ नागरिकहरु दिवा सेवा केन्द्रमा आउने गरेको केन्द्र सञ्चालन समितिका कार्यवाहक अध्यक्ष भण्डारीको भनाइ छ । ५ नम्बर प्रदेशको सामाजिक विकास मन्त्रालयको चार लाख र गाउँपालिकाको पाचँ लाख गरी कुल नौ लाखमा केन्द्र नियमित रुपमा सञ्चालनमा आएको हो ।
यता धुर्कोट गाउँपालिका प्रमुख भुपाल पोखरेलले अहिले बजेट अभावले दुई महिना मात्रै सञ्चालन गरेपनि अर्को बर्षबाट दिगो रुपमा सञ्चालन गर्ने बताउनुभएको छ । उहाले केन्द्रमा बृद्धबृद्धाहरुलाई समय कटाउन सजिलो भएकाले अव परिवारले पनि सहयोग गर्नुपर्नेमा जोड दिनुभयो ।
प्रदेश र स्थानीय सरकारसंगै परिवार र समुदायको सहयोग भए केन्द्र दिर्घकालिन रुपमा सञ्चालन गर्न सकिने पोख्रेलको भनाइ छ । उहाले उक्त सेवा केन्द्रलाई दीगो सञ्चालनको लागि गाउँपालिकाले योजना बनाएको पनि जानकारी दिनुभयो ।
