काठमाडौ
साउन १३ –
प्रतिनिधि सभाको आजको बैठकमा सांसद र मन्त्रीहरुबीच प्रश्नोत्तर हुने भएको छ ।
सांसदहरुले शिक्षा, विज्ञान तथा प्रविधि मन्त्रालय र भौतिक पूर्वाधार तथा यातायात मन्त्रालय सम्बन्धी मौखिक प्रश्नहरु सोध्ने भएका छन् ।
बैठकमा उद्योग तथा वाणिज्य र श्रम तथा उपभोक्ता हित समितिका सभापति विमलप्रसाद श्रीवास्तवले “सेफगार्ड, एन्टी–डम्पिङ तथा काउण्टरभेलिङ विधेयक सम्बन्धी समितिको प्रतिवेदन र “औद्योगिक व्यवसाय विकास प्रतिष्ठान ९पहिलो संशोधन० विधेयक सम्बन्धी समितिको प्रतिवेदन पेश गर्नुहुने भएको छ ।
त्यसैगरी कानून, न्याय तथा मानव अधिकार समितिका सभापति कृष्णभक्त पोख्रेलले “प्रशासकिय अदालत विधेयक सम्बन्धी समितिको प्रतिवेदन र राज्य व्यवस्था तथा सुशासन समितिका सभापति शशि श्रेष्ठले “प्रहरी समायोजन विधेयक सम्बन्धी समितिको प्रतिवेदन पेश गर्नुहुने संसद सचिवालयले जनाएको छ ।
बैठकमा कृषि तथा पशुपंक्षी विकास मन्त्री चक्रपाणी खनालले “जीवनाशक विषादी व्यवस्थापन विधेयक, २०७५ का सम्बन्धमा राष्ट्रिय सभाबाट भएको संशोधनमाथि विचार गरियोस्” भनी प्रस्ताव प्रस्तुत गर्नुहुने संसदको कार्यसूची रहेको छ ।
बैठक दिउसो १ बजेपछि बस्ने संसद सचिवालयले जनाएको छ ।
यता सत्तारुढ दल नेपाल कम्युनिष्ट पार्टी नेकपाको सचिवालय बैठक आज पनि बस्ने भएको छ ।
यसअघि तयारी नपुगेको भन्दै पटक–पटक स्थगित हुदै आएको सचिवालय बैठक आज पनि बस्ने नेकपा प्रवक्ता नारायणकाजी श्रेष्ठले जानकारी दिनुभयो ।
नेकपामा स्कुल विभागको नेतृत्वमा सहमति नजुटेपछि सचिवालय बैठक बस्न सकेको छैन ।
नेकपाका अध्यक्षद्वय केपी शर्मा ओली र पुष्पकमल दाहालबीच आन्तरिक छलफल जारी रहेपनि स्कुल विभागका विषयमा सहमति जुट्न नसकेको नेताहरुको भनाई छ ।
स्कुल विभागमा प्रवक्ता नारायणकाजी श्रेष्ठ र सचिवालय सदस्य ईश्वर पोखरेलले दाबी गर्दै आउनु भएको छ । दुबैको अडान कायम रहेकाले नेतृत्वलाई चित्त बुझाउन सकस परेको छ ।
बैठक दिउँसो ३ बजे बोलाइएको नेकपाका प्रवक्ता श्रेष्ठले जानकारी दिनुभयो ।
