थम्मन थापा
बागलुङ, भदौ ६ –
गलकोट नगरपालिकाका नगर उप्रमुख रेणुका काउचा मगरले विकास निर्माणमा बजेट मात्रैले समृद्वि नहुने बताउनु भएको छ ।
समुदायको सकृयता पनि उत्तिकै आवश्यक रहेको बताउनु भएको छ । चिसापानी आमा समुह गलकोट नगरपालिका ७ मल्म बामियाले हरितालिका तीजको अवसरमा आयोजना गरेको नव निर्मित सामुदायिक भवनको समुदघाटन तथा दरखाने कार्यक्रमलाई सम्वोधन गर्दै नगर उप्रमुख काउचाले यस्तो बताउनु भएको हो । तीज पर्व र परम्परालाई जोगाउनको लागि आफुमा जे छ त्यसमै रमाउनु पर्ने नगर उप्रमुख काउचाको भनाई छ ।
सो अवसरमा सामुदायिक सेवा केन्द्र गलकोटका अध्यक्ष मञ्जु शर्मा चालिसे, घुम्टे युवा परिवार मल्मका अध्यक्ष थम्मन थापा सन्देश, प्रगतिशिल आमा समुह भैसेंका निवर्तमान अध्यक्ष विष्णु कॅडेल, चिसापानी आमा समुहका पुर्व अध्यक्ष विष्णु मल्लले शुभकामना मन्तव्य राख्नु भएकक थियो ।
कार्यक्रममा उपस्थित महिला दिदीबहिनी र अतिथी वर्गलाई सामुहिक दर खुवाईएको थियो । कार्यक्रममा गलकोट नगरपालिकाको २ लाख र वडा नं ७ को १ लाख आर्थिक सहयोग र बामियाबासीको जनश्रमदानबाट चिसापानी आमा समुहले निर्माण गरेको नवनिर्मित सामुदायिक भवनको नगर उपप्रमुख रेणुका काउचा मगरले समुदघाटन गर्नुभएको छ ।
नव निर्मित सामुदायिक भवन समुदघाटन तथा दरखाने कार्यक्रम चिसापानी आमा समुह गलकोट नगरपालिका ७ मल्म बामियाका अध्यक्ष विष्णु गुरुङको अध्यक्षता, सदस्य सीता गुरुङको स्वागत र नविन थापा मगरको सञ्चालनमा सम्पन्न भएको थियो ।
