माघ २२
सुन्दा अचम्म लाग्न सक्छ ! केहि व्यक्तिको स्वार्थका लागि एक करोड १० लाख तिरेर निजि बोर्डिङ खरिद गर्ने प्रक्रिया अघि बढाईयो भन्दा । यस्तै अचम्मित पार्ने काम गुल्मीको एक विद्यालयले गरेको छ ।
जिल्लाको मालिका गाउँपालिका वडा नम्बर ८ स्थित मालिका माद्यमिक विद्यालयले केहि व्यक्तिलाई खुसी पार्नका साथै उनीहरुको स्वार्थ पुरा गरिदिन चर्को मुल्यमा स्थानीय एक बोर्डिङ स्कुलको जग्गासँगै भवन खरिद गर्ने निर्णय गरेको छ ।
मालिका माद्यामिक विद्यालयले गत वर्ष प्राविधिक शिक्षा सञ्चालनका लागि शैक्षिक तथा धार्मिक महोत्सवको आयोजना गर्यो । प्राविधिक शिक्षा सञ्चालनका लागि गरिएको महायज्ञप्रति स्थानीय अभिभावक पनि खुसि हुँदै आफु सक्दो सहयोग गरेका थियो । सबैको प्रयासबाट ७३ लाख रकम जुट्यो । अभिभावकको सक्रियतासँगै सरकारबाट पनि सहयोग प्राप्त हुँदै गयो र यो वर्षदेखि निःशुल्क प्राविधिक शिक्षा पनि सञ्चालन गरियो ।
अहिले कृषि क्षेत्रको बाली विज्ञान विषय कक्षा ९ देखि अध्यापन सुरु गरिएको छ ।
प्रयोगात्मकका लागि विद्यालयलाई जग्गा आवश्यक परेपछि विद्यालयले जग्गा खरिदको निम्ति सूचना समेत जारी गर्यो । प्राप्त भएका निवेदनमाथि कुनै छलफल नगरी निवेदन नै नदिएको स्थानीय सिभिल इङ्लिस बोर्डिङ स्कुलको चार रोपनी जग्गा सहित भवन किन्ने निर्णय भएको छ । जुन निर्णयले यहाँका अभिभावक र शिक्षाप्रेमी माथि घात भएको प्रष्ट पार्दछ ।
निजि बोर्डिङलाई मालिका माविसँग समायोजन गर्ने, कक्षा पाँच सम्म अङ्ग्रेजी माध्यमबाट अध्यापन गराउने र २०७९ सम्म एक करोड दस लाख तिर्ने सर्त उक्त निर्णयमा रहेको बताईएको छ ।
महायज्ञमा यहाँका स्थानीयले दिएको सहयोग रकम कुनै डुब्न लागेको निजि बोर्डिङ उद्धारका लागि होइन । तर अभिभावकको मर्ममाथि प्रहार गर्दै र अन्यायपुर्ण तवर गरिएको निर्णयले मालिका माविकै शिक्षकहरु चिन्तित छन् ।
