माघ २५
काठमाडौं उपत्यकालगायत विभिन्न क्षेत्रमा शनिवार वर्षा भएको छ भने उपत्यका आपसपासका उच्च पहाडी क्षेत्रमा सामान्य हिमपात भएको छ ।
पश्चिमी वायुको प्रभावसँगै विगत दुई दिनदेखि मुलुकभरको जनजीवन चिसो भएसँगै हिमाली क्षेत्रमा भारी हिमपात जारी रहेका बेला उच्च पहाडी क्षेत्रमासमेत शनिवार हिमपात भएको हो ।
तराइका क्षेत्रमा बाक्लो हुस्सुसहितको शितलहर र पहाडी क्षेत्रमा मौसम बदली भइ विभिन्न भागमा पानी पनि परिरहेको जल तथा मौसम विज्ञान विभागले जनाएको छ ।
शनिवार काठमाडौंको चन्द्रागिरी, फुल्चोकीलगायत आसपासका क्षेत्रमा सामान्य हिउँ परेको छ ।
जल तथा मौसम विज्ञान विभागका अनुसार शनिवार रातभर पनि ठाउँठाउँमा हिमपात र वर्षा भएको छ ।
आज आइतबारदेखि भने मौसम खुल्दै जाने मौसमविद् सजिना शाक्यले बताउनुभयो ।
अहिले वाग्मती र प्रदेश नं १ मा सामान्य बदली छ ।
गण्डकी, कर्णाली र सुदुरपश्चिम प्रदेशमा आंशिक बदली छ ।
वाग्मती र गण्डकीको केही क्षेत्रमा वर्षा पनि भइरहेको शाक्यले जानकारी दिनुभयो ।
अहिले सिन्धुपाल्चोक, दोलखा, सोलुखुम्बुका आसपास क्षेत्रमा पानी परिरहेको छ ।
त्यहाँका उच्च पहाडी र हिमाली क्षेत्रमा हिमपात पनि भइरहेको छ ।
मुख्यगरी हिमाली क्षेत्रसँगै प्रदश १, वाग्मती र गण्डकी प्रदेशको हिमाली र पहाडी क्षेत्रमा हिमपात राती पनि जारी हुन्छ ।
अहिले मुलुकको पश्चिम क्षेत्रमा खुलेको र वाग्मती प्रदेशमा रातीबाटै खुल्दै जाने र विहान मौसम सफा हुने जनाइएको छ ।
आइतबार सीमित पहाडी भू–भागमा आंशिक मात्रै बदली रहने अनुमान गरिएको छ ।
आगामी २४ घण्टामा उच्च पहाडी तथा हिमाली भू–भागका केही स्थानमा हल्का हिमपात तथा प्रदेश नं १, प्रदेश नं २ र वाग्मती प्रदेशका केही स्थानका साथै गण्डकी प्रदेशका एकदुई स्थानमा हल्का वर्षाको सम्भावना रहेकाले चिसोबाट बच्न आवश्यक सतर्कता अपनाउन अनुरोध गरिएको छ ।
a
