फाल्गुन ४
विघटिन प्रतिनिधिसभा सदस्य दामोदर भण्डारीलगायत नेता–कार्यकर्ताको समूह दार्चुलाकी भागीरथी भट्टकी आमा द्रोपतीसँग प्रश्न सोधिरहेको थियो । द्रोपतीले सकिनसकी छोरी मारिएको घटनाबारे बताइरहेकी थिइन् ।
भण्डारीले प्रहरीले अनुसन्धान अन्तिम चरणमा पुगेको र अपराधीलाई कानुनी कठघरामा उभ्याइने आश्वासन दिए । उनले ‘दोषी कुनै हालतमा उम्कन पाउँदैनन्’ भनेर सान्त्वना दिनै लाग्दा द्रोपदीलाई छोरीको यादले भावुक बनायो । उनी एकाएक डाँको छाडेर रुन थालिन् । ‘कति पीडा भयो होला मेरी छोरीलाई । अन्तिम पटक के भनिहोला,’ द्रोपतीले भनिन् ।
पति र सन्तान वियोगको पीर एकैसाथ खेपिरहेकी भागरथी आमा द्रोपतीको अनुहार बेचैन र मलिन थियो । दुई महिनादेखि नओभाएका उनका आँखा सुन्निएका थिए । गत पुस ७ मा उपचारका क्रममा श्रीमानको मृत्यु भएको थियो ।
