हुमाकान्त पोखरेल / ०९ वैशाख -गरिबि निवारणका लागि लघु उद्यम बिकास कार्यक्रम अन्तर्गत व्यवसायिक डल बनाउने तालिम गुल्मीको छत्रकोट गाउँपालिका –३ हर्दिनेटामा सम्पन्न भएको छ ।
१८ दिनसम्म सन्चालित तालिममा डीला कडेँलले प्रशिक्षण दिनुभएको थियो । प्रशिक्षक कडेलले १८ दिनसम्मको तालिममा प्रशिक्षार्थीले खरायो, बसेको र उठेको कुकुर, बिरालो, छोटो र लामो खुट्टाको पाण्डा तथा कुसन बनाउन सिकेको बताउनुभएको छ । अहिले सिकेका प्रत्येक खेलौनाको मुल्य न्यूनतम एक सय रुपैँयादेखि अधिकतम ३५० भन्दा बढी पर्ने उनको भनाई छ । आफुले सुरुमा रकम तिरेर सिकेको तर अहिले निःशुल्क रुपमा गाउँमै तालिम सिक्न पाउनु अवसर भएको र त्यसलाई उपयोग गर्नुपर्ने उनको भनाई छ । यस्तो प्रकारको खेलौनाको बजारको कुनै समस्या नहुने उनले बताइन् । कैँची, आँखा, नाक, मुखमा राख्ने कपडा लगायतको प्रयागेबाट बनाएको खेलौना आकर्षक देखिने, जन्मदिनमा उपहार लैजाने, सजावटको लागि लैजाने हुँदा राम्रो आम्दानी गर्न सकिने उनले जानकारी दिइन् । तालिमको सहजिकरण गरिरहेको पाल्पा विकास केन्द्रका संचालक नारायण न्यौपानेले गरिब, सिमान्तकृत र अल्पसंख्यक वर्गलाई लक्षित गर्दै राज्यले लघु उद्यम तालिम संचालन गरेको बताए ।
गरिबी निवारणका लागि लघु उद्यम विकास कार्यक्रम अहिले सम्बन्धित स्थानीय सरकारको जिम्मामा छ । छत्रकोट गाउँपालिकाकी लघु उद्यम विकास सहजकर्ता यमुना अधिकारीले यो कार्यक्रमबाट गाउँपालिकाका चारवटा वडाका ८० जना नागरिक लाभाम्बित हुने बताइन् ।
वडा नम्बर १ मा पाचँ जनालाई खेलौना बुन्ने तालिम, छ जनालाई टमाटरको सस बनाउने तालिम र १० जनालाई पशुपालनको तालिम प्रदान गरिएको छ । वडा नम्बर ३ मा १३ जनालाई खेलौना बुन्ने र बाँकी आठ जनालाई दुना–टपरी बुन्ने तालिम, वडा नम्बर ४ मा १० जनालाई व्युटिपार्लर र ११ जनालाई खुदोको परिकार बनाउने तालिम प्रदाने गर्ने अधिकारीले बताइन् । यो आर्थिक बर्षमा छत्रकोट गाउँपालिकामा कुल २९ लाखमा उद्यम विकास सम्बन्धि काम हुनेछ भने सोही रकमबाट ४० जनाले पुर्नताजकी तालिम पनि लिइसकेका छन् ।गाउँपालिका अध्यक्ष मधुकृष्ण पन्थले तालिम लिनु÷दिनुभन्दा पनि बढी तालिमको सही सदुपयोग गर्नु चुनौतीको बिषय भएको बताए । तालिम लिएका सबैले राम्रो उत्पादन गरे बजारको ग्यारेन्टी आफुहरुले गरिदिने उनले प्रतिवद्धता जनाए ।
