काठमाडौँ । भारतीय आयल कर्पोरेसन आईओसीले पेट्रोल प्रतिलिटर ८ रुपैयाँ २१ पैसा बढेको नयाँ मूल्यसूची नेपाललाई पठाएको छ । आईओसीले नेपाल आयल निगमलाई पेट्रोलियम पदार्थको बढेको नयाँ मूल्यसूची पठाएको हो।
आईओसीले बुधबार पठाएको मूल्य सूचीअनुसार पेट्रोल र मट्टितेलको मूल्य बढेको छ । त्यस्तै, खाना पकाउने एलपी ग्यास, डिजेल र हवाई इन्धनको मूल्य घटेको निगमले जनाएको छ।
निगमका अनुसार पेट्रोल प्रतिलिटर ८ रुपैयाँ २१ पैसा बढेको छ । मट्टितेलमा प्रतिलिटर ६ रुपैयाँ ९८ पैसा बढेर आएको छ । डिजेलको हकमा भने प्रतिलिटर ७ रुपैयाँ ४ पैसा घटेको छ। त्यस्तै, ग्यासमा प्रतिसिलिन्डर १ सय २२ रुपैयाँ र हवाई इन्धन प्रतिलिटर ३ रुपैयाँ ३६ पैसा घटेर आएको निगमले जनाएको छ। निगमले भारतबाट आएको सूची अनुसार नेपालमा पनि इन्धनको मूल्य समायोजन गर्ने गरेको छ।
