रुपन्देही २ मा गठबन्धनका नेता कार्यकर्ता उत्साहित, एमाले उम्मेदवार पौडेल माहोल तताउन ब्यस्त ।
कार्तिक १
रुपन्देही क्षेत्र नम्वर २ मा सत्ता गठबन्धनका तर्फबाट नेकपा एकीकृत समाजवादीका राजु गुरुङको उम्मेदवारी सदर भएसँगै गठबन्धनका नेता कार्यकर्ता उत्साहित भएका छन् ।
रुपन्देही क्षेत्र नम्वर २ का नेकपा एकीकृत समाजवादीका उम्मेदवार राजु गुरुङको उम्मेदवारी खारेज गर्ने निर्णय कार्यान्वयन नगर्न सर्वोच्च अदालतले अल्पकालीन आदेश दिएपछि सत्तारुढ दलहरु चुनावी प्रचारमा जुट्न थालेका छन् ।
रुपन्देही– २ मा नेकपा एकीकृत समाजवादीको मतभार कम छ ।
यस हिसाबले गुरुङ गठबन्धन साझेदार दलहरूको भर पर्नुपर्ने अवस्था छ । गत वैशाख ३० गतेको स्थानीय तह चुनावमा एकीकृत समाजवादीले यो क्षेत्रमा पर्ने २३ वटा वडामध्ये बुटवलको एउटा वडामा मात्र जित निकालेको थियो । गठबन्धनका नेपाली काँग्रेस, माओबादी केन्द्र, लोसपा र राष्ट्रिय जनमोर्चाको सबै भोट पाएमा भने गुरुङलाई सजिलो हुनेछ ।
रुपन्देहीको क्षेत्र नं २ बाट २०६४, २०७० र २०७४ सालको चुनावमा लगातार जितेर ह्याट्रिक गरेका नेकपा एमालेका उपाध्यक्ष विष्णु पौडेलसँग गुरुङको प्रतिस्प्रर्धा हुने छ ।
निर्वाचन अधिकृतले खारेज गरिदिएको गुरुङको उम्मेदवारी सर्वोच्च अदालतले अल्पकालीन आदेश मार्फत जोगाइदिएपछि गठबन्धनका दलहरु अहिले चुनावी रणनीति बनाउन जुटेका छन् ।
एमाले उम्मेदवार पौडेल पनि आफ्नो पक्षमा माहोल तताउन ब्यस्त हुनुहुन्छ । उहाँलाई राप्रपाको साथ छ । यहाँ गठबन्धनको कुल मत २८ हजार ६९८ छ । नेकपा एमालेले रुपन्देही– २ का २३ वडामा पाएको मत ३३ हजार १८७ छ ।
२०७४ सालमा एमाले उम्मेदवार पौडेलले ४४ हजार ९ मत ल्याउँदा उहाँका निकटतम प्रतिद्वन्द्वी कांग्रेसका युवराज गिरीले २१ हजार ९४५ मत ल्याउनु भएको थियो । रुपन्देही– २ मा १ लाख २८ हजार ६७७ मतदाता छन् ।
