कालिदास आत्रेय
मुख्यमन्त्री शैक्षिक सुधार कार्यक्रम अन्तरगत गुल्मीको छत्रकोट गाउँपालिकामा बाल शिक्षा शिक्षकका लागि चार दिवसीय तालिम सुरु भएको छ । छत्रकोट गाउँपालिकाको आयोजनामा पालिकाको सभा हलमा संचालित तालिममा छत्रकोट गाउँपालिका भरिका ४४ जना बालबिकास सहजकर्ता हरुको सहभागीता रहेको छ । शिक्षाको जगको रुपमा रहेको बालबिकास कक्षा बालमैत्री बाताबरणमा संचालन गरि बालबालिकाहरुलाई विद्यालय प्रति आकर्षित गराउने तरिका को बारेमा सबै सहजकर्ता हरुलाई जानकारी गराउने लक्ष्यका साथ तालिम संचालन गरिएको शिक्षा युवा तथा खेलकुद शाखा प्रमुख टिकाराम आचार्यले बताउनु भएको छ । छत्रकोट गाउँपालिका उपाध्यक्ष साबित्रा ज्ञवालीको अध्यक्षतामा सम्पन्न उद्घाटन सत्रमा सरस्वती सिन्जालीको स्वागत मन्तव्य रहेको थियोे । सहभागीको तर्फबाट बिना ज्ञवालीले स्वागत गीत प्रस्तुत गर्नुभएको थियोे । कार्यक्रमको मोडेल र उद्देश्य माथि प्रकाश पार्दै प्रशिक्षक प्रमिता पान्डेले मन्तव्य राख्नु भएको थियोे । कार्यक्रममा छत्रकोट गाउँपालिकाका प्रमुख प्रशासकीय अधिकृत वीर बहादुर पुनले शुभकामना मन्तव्य दिदै गरेर सिक्यो भने सिकाई दिगो हुने कुरामा जोड दिदै सहभागीहरुलाई तालिममा सिकेका कुरा कक्षामा लागू गर्न आग्रह गर्नुभएको थियो । कार्यक्रमको संचालन शिक्षा शाखा प्रमुख टिकाराम आचार्यले गर्नुभएको थियो ।
