गोविन्द गौतमले शहादत प्राप्त गरेको आज दुई वर्ष पूरा

कञ्चनपुरको पुनर्वास नगरपालिका–८ का गोविन्द गौतमले शहादत प्राप्त गरेको आइतबार दुई वर्ष पूरा भएको छ । सीमा रक्षाका क्रममा भारतीय सुरक्षाकर्मीको गोली लागेर गौतमले शहादत प्राप्त गरेका थिए ।
नेपाल–भारत सीमा क्षेत्रमा पर्ने आनन्द बजार नजिक कल्भर्ट निर्माणको विषयमा विवाद हुँदा भारतीय सुरक्षाकर्मीको गोली लागेर गौतमको ज्यान गएको थियो ।
सरकारले दोषी लाइ कारवाहि गर्ने प्रतिबद्धता जनाएको पनि दुई वर्ष पूरा हुदैछ । यसबीचमा धेरै पटक नेतृत्व पनि परिर्वतन भइसके तर, दोषी भारतीय सुरक्षाकर्मीलाई कारवाही भएको छैन । आजसम्म गौतमका परिवारको बारेमा सरकारले गरेका प्रतिबद्धता पनि पूरा भएको छैन ।
प्रधानमन्त्री केपी शर्मा ओलीले मेची–महाकाली अभियानका बेला महेन्द्रनगरमा आयोजित कार्यक्रममा दोषीलाई कारवाही हुने आश्वासन दिनुभएको थियो । त्यतिमात्रै हाइन, सत्ता र प्रतिपक्षका साना र ठूला दलका सबैजसो नेताले सीमा विवाद सुल्झाउने विषयमा बेलाबेलामा बोल्ने गरेका छन् ।
स्थानीय तहको चुनावमा धेरैले यही विषयलाई आफ्नो एजेण्डा पनि बनाए । चुनाव जितेसँगै नेतृत्वमा पुग्ने नेताले तिनै शहीद परिवारको उपेक्षा गरिरहेका छन् ।