पाल्पा – पाल्पाको रिब्दीकोट गाउँपालिकामा प्रधानमन्त्री रोजगार कार्यक्रमको शुभारम्भ भएको छ । प्रधानमन्त्री रोजगार कार्यक्रम अन्तर्गत १ सय १० जनाले एक महिनाको अवधिसम्म काम गर्न पाउनेछन ।
स्थानीय तहमा रहेका १ सय १० बेरोजगार युवालार्ई रोजगार प्रदान गरिएको गाउँपालिका अध्यक्ष नारायणबहादुर जिसीले जानकारी दिनुभयो ।
प्रत्येक कामदारको दैनिक रु ५ सय १७ ज्याला रहेको गाउँपालिका प्रशासकीय अधिकृत ऋषिराम अर्जेलले बताउनुभयो ।
बेरोजगार युवाका लागि साउनदेखि आवेदन परेका सबैलाई रोजगारी प्रदान गरिनेछ ।
रोजगार पाउने व्यक्तिलाई आवश्यक सामग्रीसमेत पूर्वउद्योगमन्त्री तथा पाल्पा निर्वाचन क्षेत्र नं २ का सांसद सोमप्रसाद पाण्डेय, प्रदेशसभा सदस्य वीरबहादुर राना, रमा घर्ती, पूर्वसांसद यादवबहादुरले हस्तान्तरण गर्नुभएको थियो ।
गाउँमै रोजगार पाएपछि स्थानीयस्तरमा बेरोजगार रही बसेका युवा खुशी बनेका छन । पहिलो चरणमा रिब्दीकोट गाउँपालिकाका ५, ६ र ७ नं वडाका बेरोजगार युवाले रोजगार पाउन सफल भएका हुन ।
