रुपन्देही २ मा घण्टी चुनाव चिन्ह रहेको राष्ट्रिय स्वतन्त्र पार्टीका गणेश पौडेलले गठबन्धनको समर्थन खोजेका छन ।
कात्तिक ६
रुपन्देही २ मा सत्ता गठबन्धन दलका राजु गुरुङको उम्मेदवारी खारेज भएपछि राष्ट्रिय स्वतन्त्र पार्टीका गणेश पौडेलले समर्थन खोजेका छन् ।
हिजो शनिवार बुटवलमा पत्रकार सम्मेलन गरी पौडेलले आफूसँग सहकार्य गरेर जानको लागि गठबन्धनको समर्थन खोजेका हुन।
उनले सहकार्य गरेर जानको लागि गठबन्धन दलहरूभित्र आन्तरिक रूपमा पनि छलफल चलिरहेको पनि बताए ।
मंसिर ४ गतेको प्रतिनिधिसभा निर्वाचनमा घण्टी चुनाव चिन्ह रहेको पौडेलले राजनीतिक नेतृत्वमा युवाको आवश्यकता रहेको भन्दै आफूले अगाडि बढेको जनाए ।
प्रदेशसभा खारेजी, निःशुल्क गुणस्तरीय शिक्षा, स्वास्थ्य, धर्म, संस्कृति र इतिहासको संरक्षण, भ्रष्टाचारीलाई कारबाही, स्रोत नखुलेको सम्पत्ति राष्ट्रियकरण उनका एजेण्डा छन् ।
लुम्बिनी क्षेत्रलाई शान्तिको राजधानी घोषणा गराई विश्वभरका पर्यटकलाई भित्र्याउने, बुटवलको सडक र खानेपानी समस्या समाधान गर्ने, व्यापारी,कृषक, विद्यार्थी तथा युवाहरूसँग हातेमालो गर्ने युवाहरूलाई रोजगारीको अवसर सिर्जना र कृषि औद्योगीकरण गर्ने,रुपन्देहीलाई मौलिकतासहितको अन्तर्राष्ट्रिय स्तरको सहरको रूपमा विकास गर्ने उनले आफ्ना एजेण्डा सुनाए ।
रुपन्देही २ मा एमाले उपाध्यक्ष विष्णुप्रसाद पौडेलले चुनाव जित्दै आएका छन् । आगामी निर्वाचनमा उनी मुख्य दाबेदारका रूपमा रहेका छन् । गुरुङको उम्मेदवारी खारेज र चर्चामा रहेका लौरो चिन्हका कमल भुसाल ‘निकोलस’को उम्मेदवारी पनि विचाराधीन रहेको अवस्थामा आफू पनि मुख्य प्रतिस्पर्धी रहेको पौडेलको दाबी छ ।
पत्रकार भेटघाट कार्यक्रममा राष्ट्रिय स्वतन्त्र पार्टीको तर्फबाट समानुपातिक उम्मेदवार लक्ष्मी खासु मगर , पार्टीका लुम्बिनी प्रदेश कमिटी कोषाध्यक्ष सालिकराम घिमिरे, प्रदेश कमिटी सदस्य लक्ष्मण खड्का, निर्वाचन परिचालन कमिटी सदस्य पोषण पाण्डे, प्रदेश सदस्य अच्युत कँडेलले युवाबाट परिवर्तन हुने बताए ।
रुपन्देही २ मा गठबन्धनले सहयोग गर्ने वातावरण बन्दै गएको उनीहरुको भनाइ छ । राजुको उम्मेदवारी खारेजपछि गठबन्धन दलहरू कसलाई उम्मेदवार बनाउने भन्नेमा आन्तरिक छलफलमा रहेका छन् ।
