प्रधानमन्त्री एवं नेकपाका अध्यक्ष केपी शर्मा ओलीले पार्टी एकताको बाँकी काम छिट्टै पूरा हुने बताउनुभएको छ । बिहीबार राजधानीमा आयोजित नेकपाको प्रदेश ३ को पहिलो बैठकमा बोल्दै अध्यक्ष ओलीले पार्टी एकतामा ढिलाइ भएको स्वीकार गर्नुभयो ।
उहाँले भन्नुभयो‘ झण्डै दश महिना भयो । पार्टी एकता यति समयसम्म लाग्न हुँदैनथ्यो । अस्वाभाविक भयो,अब छिट्टै टुङ्गिन्छ ।’ तत्कालीन नेकपा एमाले र तत्कालीन माओवादी केन्द्रले गएको वर्ष जेठ ३ गते पार्टी एकीकरणको घोषणा गरेका थिए ।
अध्यक्ष ओलीले पार्टी एकताका विषयमा असन्तुष्टि भए पार्टीभित्रै राख्न र भागवण्डामा आफू परिन भनेर नआत्तिन पनि नेता कार्यक्रतालाई आग्रह गर्नुभएको छ ।
प्रधानमन्त्री ओलीले अब क्रान्तिका नाममा हिंसाको बाटो समात्नुको कुनै औचित्य नभएको पनि बताउनुभएको छ । उहाँले अब कुनै अधिनायकवादको आकाङ्क्षा सम्भव नभएको र हिंसाबाट सत्ता कब्जा हुन्छ भन्ने सपनाको छेउमा पनि पुग्न नसकिने स्पष्ट पार्नुभयो ।
कार्यक्रममा अध्यक्ष ओलीले २१७ सदस्यीय प्रदेश कमिटीका सदस्यलाई सपथ दिलाउनुभएको छ । कार्यक्रममा पार्टीका सचिवालय सदस्य रामबहादुर थापा र महासचिव विष्णु पौडेल, प्रदेश इञ्चार्ज अष्टलक्ष्मी शाक्य र सहइञ्चार्ज हितबहादुर तामाङलगायत उपस्थिति हुनुहुन्थ्यो ।
