रोजगार संयोजकको पहिलो चरणको छनोट सूची सार्वजनिक भएको छ । प्रधानमन्त्री रोजगार कार्यक्रम कार्यन्वयन लागि दोस्रो पटक माग गरिएको रोजगार संयोजकका लागि लिइएको आवेदनबाट प्रारम्भिक सूची सार्वजनिक गरिएको हो ।
२ सय ६८ जना संयोजकका लागि गएको फागुन ३० गते आवेदन माग गरिएकोमा ९ हजार ८ सय ७४ जनाको आवेदन परेको थियो । तीमध्येबाट श्रम, रोजगार तथा सामाजिक सुरक्षा मन्त्रालयले योग्यता र अनुभवका आधारमा प्रारम्भिक सूचीमा परेका प्रतिस्पर्धीको नाम सार्वजनिक गरेको हो ।
सरकारले पहिलो पटक कम्प्युटरका माध्यमबाट लिएको परीक्षामा आवश्यक सङ्ख्यामा उत्तीर्ण हुन नसकेपछि दोस्रो पटक आवेदन माग गरिएको हो ।
शुक्रबार सार्वजनिक गरिएको प्रारम्भिक छनोटमा पर्नेहरुको चैत २३ गते कम्प्युटरबाट परीक्षा लिइने छ । परीक्षा काठमाण्डौमा हुने श्रम, रोजगार तथा सामाजिक सुरक्षा मन्त्रालयले जनाएको छ ।
