गत वर्ष प्रदर्शनमा आएको अभिनेत्री झरना थापा निर्देशित डेब्यू फिल्म “ए मेरो हजुर २”बाट अभिनेता सलिनमान बनियाको नेपाली फिल्मी संसारमा उदय भएको थियो । अभिनेता द्वय अनमोल केसी र प्रदीप खड्काले फिल्म गर्न अस्वीकार गरेपछि झरनाको नजरमा परेका थिए, उनी । उनको लुक्स र गेटअपले झरनालाई तानिहाल्यो र बनाइन् अभिनेत्री साम्राज्ञी आरएल शाहको हिरो ।
फिल्म रिलिज नहुँदै सलिनलाई नेपाली फिल्ममा सम्भावना बोकेको अभिनेताको रुपमा हेर्न थालिएको थियो । डेब्यू फिल्म बक्सअफिसमा जबरजस्त हिट भएपछि सलिन राम्रै चम्किए । अभिनय कमजोर भएता पनि उनको लुक्स, हेयर स्टाइल र ड्रेसअपले दर्शकलाई भुतुक्कै बनायो । अनमोल र प्रदीपका लागि उनी “थ्रेट” हुनसक्ने चर्चा पनि सुरु हुन थालेको थियो ।
“ए मेरो हजुर २” गर्नुभन्दा अगाडि अत्यन्त कम नेपाली फिल्म हेरेका उनलाई फिल्ममा लिन अहिले निर्माताबीच तानातान हुने गरेको छ । तर, उनलाई फिल्म गरेर पैसा कमाउनु छैन । सम्पन्न परिवारमा हुर्किएका सलिन दर्शकको मायाका लागि फिल्म गर्ने बताउँछन् । “मलाई फिल्म गर्ने कुनै चाहना थिएन । बरु, बडि विल्डिङमा सौख थियो । यद्यपि, फिल्ममा प्रवेश गरिहालेँ अब राम्रो काम गरेर देखाउँछुु, एक भेटमा उनी सुनिए ।”
उनको दोस्रो फिल्म यात्रा यही चैत २९ मा रिलिज हुँदैछ । यसमा उनले एक भ्लगरको भूमिका निभाएका छन् । दोस्रो फिल्मको रुपमा यात्रा नै रोज्नुको कारणबारे उनले भने “मलाई चरित्र साह्रै मनपर्यो। मलाई सुहाउने भूमिका भएकै कारण गरेको हुँ ।”अभिनय कमजोर रहेको आलोचना पनि यसपटक कम हुने उनको विश्वास छ । यसपटक अभिनयमा निखारता ल्याउन एकदमै मेहनत गरेको छुु, उनले भने । सम्भवतः नेपाली फिल्मको इतिहासमा सबैभन्दा धेरै दिन छायांकन भएको फिल्म हो यात्रा। करीब ९५ दिन क्यामेरा “अन” भएको थियो । छायांकन अवधि लम्बिएका कारण निर्माताको लगानी तेब्बर बढ्यो । निर्माता केशव भट्टराईका अनुसार, फिल्ममा करीब ३ करोडको लगानी छ । यो लगानी सुरक्षित गर्न मात्र फिल्मले घरेलु बजारमा ९ करोड ग्रस कलेक्सन गर्नुपर्छ ।
सलिनको भरमा फिल्मले लगानी उठाउन गाह्रो रहेको फिल्म पण्डितहरु बताउँछन् । यात्रा ले घोषणा गरेको प्रदर्शन मितिमा अभिनेता अनमोल केसी स्टारर फिल्म ए मेरो हजुर ३ पनि भिड्दैछ । दुई फिल्म बक्सअफिसमा आमने/सामने हुँदा दर्शक र हल संख्या विभाजित हुन्छ, जसको सिधा प्रभाव कलेक्सनमा पर्छ । तर, पनि सलिन फिल्मले लगानी सुरक्षित गर्नेमा ढुक्क छन् । फिल्म राम्रो बनेका कारण कमाई पनि राम्रो हुने उनको विश्वास छ ।
यात्रा को लिड हिरो भएका कारण सलिनको काँधमा ठूलो जिम्मेवारी छ । उनलाई निर्माताको करोडौंको लगानी “रिकभर” गर्नुपर्ने चुनौती छ । साथमा वर्षकै ठूलो फिल्म ए मेरो हजुर ३ सँग भिडन्त गर्नुपर्ने छ । कति प्रेसर महशुस गरिरहनुभएको छ रु एक कफी भेटमा उनले भने प्रेसर त एकदमै छ । यस्तै प्रेसर हुन्छ भनेर नै हामीले एकदमै मेहनत गरेका छौं । मलाई सबैले सहयोग गर्नुभएको छ । हेरौं अब भोली के हुन्छ । आशा छ राम्रै हुन्छ । यात्रा लाई सम्राट शाक्यले निर्देशन गरेका हुन् । ३ दर्जन बढी फिल्ममा सहायक निर्देशक भएर काम गरेका उनले यही फिल्मबाट निर्देशनमा डेब्यू गरेका हुन् । फिल्ममा सलिनको अपोजिटमा मलिका महत छिन् । सलोन बस्नेत, रेअर राई, जान्हवी बस्नेत, प्रेक्षा बज्राचार्य, विशाल सापकोटा, राजाराम पौडेल, धिरेन शाक्यलगायतका कलाकारहरुको पनि फिल्ममा अभिनय छ । यसलाई संजय लामाले खिचेका हुन् ।
