सरकारले राष्ट्रिय अखण्डता माथी नै प्रहार गरेको नेपाली काँग्रेसका बरिष्ठ नेता रामचन्द्र पौडेलले बताएका छन । आज बिहान नेपाल प्रेस युनियन रुपन्देहीले बुटवलमा आयोजना गरेको पत्रकार सम्मेलनमा उनले सिके राउतसंग सरकारले गरेको सम्झौतामा जनमत संग्रहको कुरा गरेर राष्ट्रियताको बारेमा सरकार नै गम्भिर नभएको बताए । “सरकार कति धेरै अपरिपक्व र हावा रहेछ भन्ने कुरा यहि सहमतिबाट प्रष्ट भएको छ”। उनले भने सरकारका काम कारवाहीको विषयमा धारणा राख्दै उनले वाइडबडी काण्डमा तत्कालिन पर्यटन मन्त्री रविन्द्र अधिकारी निर्दोश रहेको भन्ने प्रधानमन्त्री केपी शर्मा ओलीको भनाईलाई सत्यलाई ढाकाछोप गर्न असत्यको प्रचार प्रसार गरेको टीप्पणी गरे । अख्तियारलाई समेत चुनौती दिने गरी आएको प्रधानमन्त्रीको अभिव्यक्ती ढाक छोप गर्ने प्रपन्च भएको पौडेलले बताए । उनले छानविन आयोग भन्दा पनि ढाकछोप आयोग बनाएर पर्दा हाल्ने काम मात्रै प्रधानमन्त्रीले गरको बताए । बरिष्ठ नेता पौडेलले प्रतिप्रश्न गर्दै भने ‘केपी ओली अदालत हो, अख्तियार प्रमुख हो रु कहि नभएको जात्रा हुदै गरेको छ ।’ विप्लव नेतृत्वको नेकपालाई बेलैमा सम्बोधन गर्नुको विकल्प नभएको भन्दै उनले सरकारले अविलम्ब वार्तामा बोलाएर अगाडी बढाउनको लागि आग्रह गरे । शान्ति सुरक्षा, शुसाशन र बिकास निर्माणमा सरकार पुर्ण रुपमा असफल भएको दाबी गर्दै नेता पौडेलले “राष्ट्रियताको नारा बोकेर राष्ट्रघाति काम गर्ने प्रधानमन्त्रीलाई कठघरामा उभ्याउनु पर्छ” भने ।
