विराटनगरमा जारी साफ महिला च्याम्पियनिसिप फुटबलमा नेपाल समूह ए को विजेता बन्दै सेमिफाइनलमा प्रवेश गरेको छ । पहिलो खेलमा भुटानलाई ३–० गोलले पराजित गरेको नेपाल समूह चरणको अन्तिम खेलमा बंगलादेशविरुद्ध पनि ३–० कै जित निकाल्न सफल भयो । जितसँगै ६ अंक जोडेको नेपाल समूह ए बाट सेमिफाइनलमा स्थान बनाउँदा बंगलादेश ३ अंकसहित उप विजेता बन्दै अन्तिम चारमा पुगेको हो । नेपालको जितमा तीन गोल नै पहिलो हाफमा सम्भव भएका थिए । आत्मघाती गोलबाट खेलमा अग्रता बनाएको नेपालका लागि सावित्रा भण्डारी र अञ्जली कुमारी योञ्जनले एक एक गोल थपे । मसुरा प्रविनले पाँचौं मिनेटमा आत्मघाती गोलका कारण नेपालले शुरुवाती अग्रता लिएको थियो । त्यसअघि नेपालले एउटा सुवर्ण अवसर गुमाएको थियो । सावित्रा भण्डारीले वन भर्सेस वनको स्थितीमा पनि गोल गर्न सकेकी थिइनन् । १०औं मिनेटमा निरु थापाले पनि एउटा राम्रो अवसर गुमाउन पुगिन् । २१औं मिनेटमा सावित्रा भण्डारीले बंगलादेशको कमजोर डिफेन्सको फाइदा उठाउँदै गोल गर्दा नेपालले २–० को अग्रता लिएको थियो । २८औं मिनेटमा सावित्राकै पासमा अञ्जलीले गोल गर्दै नेपाललाई पहिलो हाफअघि ३–० को अग्रता दिलाइन् । दोस्रो हाफमा थप गोल नभएपछि नेपाल अन्ततः ३–० को जित निकाल्न सफल भयो ।
