गुल्मी ।गुल्मी कांग्रेसले प्रथम जिल्ला सम्मेलनको मिति तय गरेको छ ।यसअघि गर्ने भनिएको सम्मेलन पार्टीको महासमिति बैठकका कारण केन्द्रीय नेताहरुको अनुपस्थित हुने देखिएपछि स्थगित भएको कार्यक्रम यहि चैत्र १६ र १७ गते गर्न लागेको हो ।
जिल्ला सम्मेलनलाई कांग्रेस सभापति तथा पूर्व प्रधानमन्त्री शेरबहादुर देउवा, वरिष्ठ नेता रामचन्द्र पौडेल, महामन्त्री शंशाक कोइरला, केन्द्रीय सदस्य तथा पार्टी प्रवक्ता विश्वप्रकाश शर्मा, केन्द्रीय सदस्यहरू गगन थापा, गुरु घिमिरे, डा। चन्द्र भण्डारीलगायतका केन्द्रीय नेताहरुले सम्बोधन गर्ने पार्टी सभापति भुवनप्रसाद श्रेष्ठले नेपाल तारालाई जानकारी दिए ।।
पार्टीले १६ गते उद्घाटन कार्यक्रम गर्ने र १७ गते जिल्लाका अगुवा कार्यकर्ता, जिल्ला, क्षेत्रिय तहका नेता, भातृ संगठन प्रमुखलाई प्रशिक्षण दिने कार्यक्रम तय भएको उपसभापति विष्णु बलालले जानकारी दिए । उनका अनुसार १७ गतेको प्रशिक्षण कार्यक्रमलाई डा। गोविन्द्र पोखरेल लगायतले प्रशिक्षण दिनेछन् ।
सङ्गठनलाई जिल्लादेखि गाउँ र स्थानीय तहसम्म पार्टी सङ्गठनलाई बलियो र सशक्त ढङ्गले अगाडि बढाउने, कार्यकर्तालाई प्रशिक्षण दिने, वर्तमान सरकारले गरेका ज्यादतीको भण्डाफोर गर्ने यो सम्मेलनले महत्वपूर्ण भूमिका खेल्ने उनको भनाई थियो ।
