पाल्पाको रिब्दीकोट गाउँपालिका–५ नयाँटोलाकी ५० वर्षीया ओमकुमारी घर्तीमगरको हत्या गरेको आरोपमा एक जना पक्राउ परेका छन्। पक्राउ पर्नेमा सोही ठाउँका ४६ वर्षीय नुरबहादुर विश्वकर्मा रहेको जिल्ला प्रहरी कार्यालय पाल्पाका प्रहरी उपरीक्षक विश्वमणी पोखरेलले बताउनुभयो। गत फागुन २४ गते घरबाट हार्थोक बजार हिँडेकी ओमकुमारी फागुन ३० गते रिब्दीकोट गाउँपालिका–५ ज्योतिष टोलस्थित कुसुमखोलादेखि नयाँटोला जाने गोरेटो बाटोमा मृत अवस्थामा फेला परेकी थिइन्। खरबारीमा घाँस काट्न जाँदै गरेका स्थानीयले उनको शव देखेर प्रहरीलाई खबर गरेका थिए। शव सडेको अवस्थामा फेला परेको थियो। एकल महिला घर्तीमगरसँग अनैतिक सम्बन्ध राखेका विश्वकर्माले घटनालाई ढाकछोप गर्न हत्या गरेको प्रारम्भिक वयानमा खुलेको प्रहरीले जनाएको छ।
