प्रधानमन्त्री केपी शर्मा ओलीले आज सातै प्रदेशका मुख्यमन्त्रीहरुसँग भेटघाट र छलफल गर्नु भएको छ । बालुवाटारमा भएको भेटमा सातवटै प्रदेशका मुख्यमन्त्रीहरूसँग संघीय सरकारको नीति तथा कार्यक्रम र बजेटका बारेमा छलफल भएको वताईएको छ ।
भेटमा नयाँ आर्थिक वर्षका लागि तयार हुने नीति तथा कार्यक्रम, बजेट तथा सार्वजनिक सरोकारका विषयमा छलफल भएको प्रधानमन्त्री ओलीका प्रेस संयोजक चेतन अधिकारीले जानकारी दिनुभयो । बैठकमा प्रधानमन्त्री ओलीले अन्तरप्रदेश समन्वय परिषदको अघिल्लो बैठकले पास गरेका २९ बुँदाको कार्यन्वयन तदारुकताका साथ गरिने जानकारी दिनुभएको थियो ।
मुख्यमन्त्रीहरुसँग भेटघाटको विशेष एजेन्डा नभएपनि विकास परिषद्को बैठकका लागि काठमाडौं आएको मौकामा प्रधानमन्त्रीसँग सबैले एकैपटक भेट गरेका हुन् । पन्ध्रौं योजनाको आधारपत्रमाथि छलफल गर्न विकास परिषद्को बैठक हिजोबाट काठमाडौमा जारी छ ।
काठमाडौंको ताहाचलस्थित सोल्टी होटलमा चलेर आज सकिने बैठकले योजनाको आधारपत्रलाई अन्तिम रूप दिने योजना आयोगले जनाएको छ ।
परिषद बैठकबाट प्राप्त सुझाव समेटेर आधारपत्रलाई अन्तिम रूप दिई मन्त्रिपरिषदमा प्रस्ताव पठाउने तयारी आयोगले गरेको छ । आयोगले वैशाख पहिलो साताभित्र आधारपत्र सार्वजनिक गर्ने जनाएको छ ।
