सरकारले गत चैत्र १४ गते बिहीबार बसेको मन्त्री परिषद बैठकको निर्णय सार्वजनिक गरेको छ ।बैठकको निर्णयबारे जानकारी दिन आयोजित पत्रकार सम्मेलनमा संचार तथा सूचना प्रविधिमन्त्री गोकुलप्रसाद बास्कोटाले आँधी–हुरी पीडितको उद्धार तथा राहतमा कमी हुन नदिन संघीय सरकारले प्रदेश सरकार, स्थानीय सरकार, विभिन्न सामाजिक संघ, संस्थाहरूलाई परिचालन गरिरहेको बताउनुभयो।
बारा र पर्साका आँधी–हुरी पीडितको राहत तथा उद्धारमा कुनै कमी नरहेको उहाले दावी गर्नुभयो।
मन्त्री बास्कोटाले पीडितका लागि आवश्यक अस्थायी प्रकृतिको खाने, बस्ने, औषधि उपचार गर्ने लगायतका व्यवस्था गरिएको पनि बताउनुभयो। मन्त्री बास्कोटाले आँधी–हुरी पीडितको धनमालको क्षतिको एकीन विवरण आएपछि पुनस्थापना र पुनर्वासका आवश्यक व्यवस्था सरकारले मिलाउने पनि स्पष्ट पार्नुभयो।
प्रधानमन्त्री केपी ओली आफैँले स्थलगत अवलोकन गरी पीडितको पुनर्वासको व्यवस्था गराउने प्रतिबद्धता जनाएको र त्यसका लागि आवश्यक तयारीको कामलाई अघि बढाइएको पनि मन्त्री बास्कोटाको भनाई छ। गत चैत्र १७ गते आइताबार साँझ आएको आँधी–हुरीमा परी बारा र पर्साका गरी २८ जनाको ज्यान गएको छ भने सयौँको संख्यामा घाइते भएका छन्। घाइतेहरूको सरकारले निःशुल्क स्वास्थ्य उपचारको व्यवस्था पनि गरेको छ।
