आइतबार, १ बैशाख, २०७६
काठमाडौं । राष्ट्रपति विद्यादेवी भण्डारीले नववर्ष २०७६ को सुखद् अवसरमा स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, शान्ति एवं समृद्धिका लागि हार्दिक शुभकामना व्यक्त गरेकी छन् ।
नव वर्ष २०७६ का अवसरमा आज दिएकी शुभकामना सन्देशमा उनले मुलुकको राष्ट्रिय संकल्प ‘समृद्ध नेपाल सुखी नेपाली’को साझा लक्ष्यप्राप्त गर्न २०७६ साल महत्वका साथ अगाडि बढ्ने विश्वास व्यक्त गरेकी छन् ।
सन्देशमा राष्ट्रपति भण्डारीले नेपाल र नेपालीको यो दृढ संकल्प साकार तुल्याउने अभियानमा हामीलाई माया गर्ने सम्पूर्ण अन्तर्राष्ट्रिय जगतको साथ र सहयोग पाउने विश्वास व्यक्त गरेकी छन् ।
नयाँ वर्ष मुलुकमा समृद्धि र दिगो शान्तिका साथ महत्वपूर्ण उपलब्धि हासिल गरेको वर्ष बन्न सकोस् भन्ने कामनासमेत राष्ट्रपति भण्डारीले गरिन् ।
यसैगरी उपराष्ट्रपति नन्दबहादुर पुनले पनि शुभकामना सन्देश जारी गर्दै देश ‘समृद्ध नेपाल, सुखी नेपाली’ को नाराका साथ स्थायी शान्ति, दिगो विकास र आर्थिक समृद्धिको मार्गमा अगाडि बढिरहेको बताएका छन् ।
२०७५ साल विकास र समृद्धिका लागि बलियो जग बनाएर बिदा भएको भन्दै उनले शुभकामना सन्देशमा नयाँ वर्ष आर्थिक सामाजिक रुपान्तरणसहितको विकास र समृद्धिका लागि छलाङ हान्ने वर्ष हुने अपेक्षा गरेका छन् ।
यस्तै नेपाली कांग्रेसका सभापति शेरबहादुर देउवाले नयाँ वर्ष एकता, शान्ति र समृद्धिको बाटोमा अघि बढाउन, लोकतन्त्र र विकासको एजेण्डामा संगठित गर्न, गाउँ–नगरमा शान्ति, सामाजिक सद्भाव र एकता सुदृढ बनाउन तथा बलियो राष्ट्र र सुदृढ नेपाली राष्ट्रियताको जगमा आर्थिक विकासको दिगो आधार स्थापना गर्न सफल होस् भन्ने कामना गरेका छन् ।
उनले मुलुकमा संघीय लोकतान्त्रिक गणतन्त्रात्मक शासन व्यवस्थाको संस्थागत स्थायित्व कायम गरी आर्थिक समृद्धिको मार्गमा अग्रसर बनाउन नयाँ वर्षले सबै नेपालीलाई प्रेरणा मिल्ने विश्वाससमेत व्यक्त गरेका छन् ।
