नयाँ शैक्षिक शत्र शुरु भएसँगै गुल्मीको रुरु गाउँपालिकाले विद्यालय उमेरका बालबालिका विद्यालय बाहिर रहे नरहेको तथ्यांक यकिन गर्न शुरु गरेको छ ।
गाउँपालिकालाई पूर्ण भर्ना युक्त बनाउनका लागि अभियान शुरु गरिएको गाउँपालिकाको भनाई छ ।
गाउँपालिकाका अनुसार तथ्यांक यकिन गर्नका लागि जनप्रतिनिधि, गाउँ शिक्षा समितिका सदस्य, विद्यालय व्यवस्थापन समिति, शिक्षक र विद्यार्थी परिचालन गरिएको छ ।
गाउँपालिकाका अध्यक्ष निलकण्ठ गौतमले बालबालिकालाई आधारभूत तहको शिक्षा सुनिश्चित गर्नका लागि अभियान शुरु गरिएको बताए ।
उनका अनुसार अभियानमा विद्यालय उमेरका बालबालिका विद्यालयमा भए नभएको यकिन गरि विद्यालय बाहिर रहेको पाईए विवरणात्मक सूची बनाईनेछ ।
सूची तयार भएपछि ति बालबालिकालाई कुन प्रकारको प्रोत्साहन र सहयोग आवश्यक पर्छ त्यस अनुसार सहयोग गाउँपालिकाले गर्नेछ । मुख्यगरी गाउँपालिकाले पोशाक, स्टेशनरी, पाठ्यपुस्तकका लागि सहयोग गर्ने नीति ल्याएको छ ।
विद्यालय सेवा क्षेत्रमा विद्यालय व्यवस्थापन समितिका सदस्यहरु, शिक्षकहरु, विद्यार्थीहरु परिचालन गरी विद्यालय उमेरका बालबालिका विद्यालय बाहिर भए नभएको विद्यालयले सुनिश्चित गर्नेछन् ।
त्यसैगरी वडा कार्यालयले जनप्रतिनिधिहरु परिचालन यकिन गर्ने र गाउँपालिकामा बैशाख ७ गतेभित्र पठाउनेछ । त्यसपछि विद्यालय बाहिर बालबालिका भेटिए उपयुक्त परामर्श, प्रोत्साहन र सहयोग गरी बैशाख १४ गतेभित्र विद्यालयमा प्रवेश गराउने गाउँपालिकाको कार्यक्रम छ ।
गाउँपालिकाले अग्रेजी माध्यमको पाठ्यपुस्तकका लागि पाँच लाख बजेट बिनियोजन गरेको छ । उक्त रकम बालबालिकालाई विद्यालयसम्म ल्याउनका लागि समेत प्रयोग गर्न सकिने गाउँपालिकाका प्रवक्ता शेषनारायण पौडेलले जानकारी दिए ।
रुरु गाउँपालिकामा विद्यालय तह कक्षा १–१० मा पाँच प्रतिशत बालबालिकाले बीचमै विद्यालय छाड्नेको गरेको तथ्यांक छ ।
विद्यालय उमेरका बालबालिकालाई विद्यालयभित्र ल्याउनका लागि दुई चरणमा बैठक भई काम अगाडी बढेको गाउँपालिकाका शिक्षा प्रमुख बामदेव ज्ञवालीले जानकारी दिए ।
रुरु गाउँपालिकाका सामुदायिक ४३ र संस्थागत तीन गरी ४६ वटा विद्यालय रहेका छन् ।
नेपाल सरकारले भर्ना अभियानको नारा ‘हाम्रो सहर, हाम्रो गाउँ, सबै बालबालिकालाई विद्यालय पुर्याउ तय गरेको छ ।
रुरु गाउँपालिकाको नेपालको शिक्षाको इतिहासमा गर्विलो इतिहास छ । गाउँपालिकाको रिडिमा बि।स। १९६९ मा संस्कृत भाषा पाठशालाको नाममा स्थापना भएको थियो ।
