गुल्मीका सामुदायिक विद्यालयहरुले बस सेवा संचालनमा ल्याएका छन् । सामुदायिक विद्यालयमा विद्यार्थीको आकर्षण बढाउन गुल्मीका सामुदायिक विद्यालयहरुले बस सेवा संचालनमा ल्याएका हुन ।
अहिले जिल्लाका तीनओटा सामुदायिक विद्यालयहरुले बस सेवा संचालनमा ल्याएका छन। अधिकाशं सँस्थागत विद्यालहरुले मात्र बस सेवा संचालनमा ल्याइरहेका बेला विद्यार्थीको आकर्षण बढाउन सामुदायिक विद्यालयहरुले बस सेवा संचालन गरेका हुन
छत्रकोट गाउँपालिका ४ दिगामस्थित आदर्श माध्यमिक विद्यालय, रेसुगां नगरपालिका १ स्थित महेन्द्र नमुना माध्यमिक विद्यालय र रेसुगां नगरपालिका ८ स्थित सिद्धबाबा माध्यमिक विद्यालयले बस सेवा संचालन गरेका छन ।
तीनओटै विद्यालयले यसै शैक्षिक सत्रदेखि सेवा सुरु गरेका हुन् । आदर्श माविले कुल ४१ सिट क्षमताको बस खरिद गरेको छ । बसमा एकातर्फ दुई र अर्कोतर्फ तीन सिट रहेका छन् ।
टाटा कम्पनीको ७१२ मोडलको बसको कुल लागत २९ लाख लागेको प्रध्यानाध्यापक गुणकर ज्ञवालीले जानकारी दिनुभयो ।
जसमध्ये गाउँपालिकाले १५ लाख, स्थानीय चन्दादाता तथा पूर्व विद्यार्थी मञ्चले तीन लाख प्रदान गरेको छ । भने अन्य रकम चन्दादाता तथा आन्तरिक श्रोतबाट व्यवस्थापन गरिने प्रध्यानाध्यापक ज्ञवालीले जानकारी दिनुभएको छ ।
छत्रकोट गाउँपालिका ५ को मनभाग बजारबाट वडा नम्बर ४ अघाँ, सोहि वडाकै सातमुरे, बुहा, मौलिपुर, बोखर लगायतका क्षेत्रबाट विद्यार्थी ल्याउने विद्यालयले जनाएको छ ।
बसबाट झण्डै एक सय ५० विद्यार्थी लाभाम्बित हुने प्रध्यानाध्यापक ज्ञवालीले बताउनुभयो ।
यस्तै रेसुगां नगरपालिका १ स्थित महेन्द्र माध्यमिक विद्यालयले दुईवटा बस सेवा संचालनमा ल्याउने तयारी गरेको छ ।
एउटा बस विद्यालय आफैले खरिद गर्ने र अर्को बस भारतिय राजदुतावासले प्रदान गरेको छ । राजदुतावासले प्रदान गरेको बस वैशाख १६ गतेबाट संचालनमा आएको छ ।
भने विद्यालयले किन्ने बस पनि वैशाखभित्रै संचालनमा ल्याइने प्रध्यानाध्यापक केशर बहादुर थापाले जानकारी दिनुभयो ।
सिद्धबाबा माध्यमिक विद्यालयमा पनि यसै आर्थिक बर्षदेखि बस सेवा संचालनमा आएको छ ।
बसले बजार क्षेत्रभित्रका विद्यार्थीहरुलाई पु¥र्याउने प्रध्यानाध्यापक डोर विक्रम श्रीसले जानकारी दिनुभयो । कुल २९ लाख लागत लागेको बसलाई विद्यालय व्यवस्थापन समिति, शिक्षक, विद्यार्थी, चन्दादाता लगायतले सहयोग गरेको प्रध्यानाध्यापक श्रीसको भनाई छ ।