बुटवल ।
बुटवलको बसपार्क सरसफाई हुने भएको छ । बुटवल तिनाउ सरसफाई अभियानले अभियानको ५० औं हप्ता पुग्न लागेको अवसरमा बसपार्कमा ३ हप्ता लगातार सरसफाई गर्न लागेको हो ।
अभियानले बुटवलमा पत्रकार सम्मेलनको आयोजना गरी गत बर्ष असार ९ गते देखि सुरु भएको अभियान जेठ १८ गते ५० औं हप्ता पुग्दै छ । अभियानका संयोजक ठाकुर गैह्रेले बसपार्क बाट अभियान सुरु भएकाले अभियानको ४७ औं देखि ५० औं हप्ता बसपार्कमा गर्न लागिएको बताउनुभयो ।
बुटवल सुन्दर र सफा छ भन्ने सन्देश बसपार्कमा आएका यात्रुहरुबाट जाने भएकाले बसपार्कलाई सुन्दर र सफा राख्न अभियान चलाइरहने उहाले बताउनुभयो । पछिल्लो समय गुट्खा र प्लाष्टिकजन्य फोहोरका कारण कुरुप बन्दै गएको बताउँदै अभियानमा व्यवसायीको साथ समेत नभएको उहाले गुनासो गर्नुभयो।
अभियानका सह संयोजक कृष्ण कंडेलले सरसफाई अभियान सुरु गरेपनि घरअगाडिकै फोहोर फाल्न व्यवसायी एवं घरधनी नआएको भन्दै सवैको सहयोगमा मात्र अभियानले सार्थकता पाउने बताउनुभयो । अभियानमा पहिलो पाईला बुटवल शाखा, गुल्मी सिमिचौर सम्पर्क समाज, खुद्रा किराना व्यवसायी संघ, औद्योगिक शसस्त्र प्रहरी बल, नेपाली सेना, ट्राफिक प्रहरीको सहयोग समेत छ । बुटवल तिनाउ सरसफाई अभियानले ५० औं हप्ताको अवसरमा विशेष सचेतना कार्यक्रम समेत गर्ने बताएको छ ।
कार्यक्रममा बोल्दै बुटवल उपमहानगरपालिकाका प्रमुख प्रशासकिय अधिकृत चक्रपाणी शर्माले आम नगरबासीमा सचेतना जगाउन नसक्दा सम्म सरसफाई अभियान प्रभावकारी हुन नसक्ने बताउनुभयो। जनसहभागिता संगै सचेतना जगाउन सके बुटवल सरसफाईमा नम्बर एक हुने उहाको भनाई थियो । पहिलो पाईला बुटवलका संयोजक भरत जंग केसीले जनप्रतिनिधीहरुले समेत अभियानमा साथ नदिएको गुनासो गर्नुभयो ।
