२८ बैशाख ,गुल्मी –
गुल्मी ट्राफिक प्रहरीले दुर्घटना न्यूनिकरण गर्न भन्दै फरक फरक तरिकाबाट सचेतना अपनाएको छ । केहि दिन अघि साताव्यापी ट्राफिक सप्ताह सम्पन्न गरेको जिल्ला ट्राफिक कार्यालय गुल्मीले दुर्घटना न्यूनिकरण गर्न दैनिकजसो सचेतना कार्यक्रमहरु गर्दै आएको छ ।
‘ट्राफिक नियम जनौ र मानौ, आफुपनि बचौ अरुलाई पनि बचाऔं’ भन्ने नाराका साथ ट्राफिक प्रहरीले गुल्मीमा दुर्घटना न्यूनिकरण गर्न अधिकतम प्रयास थालनी गरेको छ । जिल्लाका बिभिन्न स्थानमा ट्राफिक प्रहरीले सवारी चेक जाँचसँगै सडक प्रशिक्षण गर्दै आएको हो ।
सडक प्रशिक्षण दुर्घटना न्यूनिकरणको प्रभावकारी बन्दै गएपछि यसलाई निरन्तरता दिन कार्यक्रम गर्दै आएको जिल्ला ट्राफिक कार्यालय गुल्मीका प्रमुख प्रहरी नायव निरिक्षक पृथ्वी काफ्लेले बताए । ट्राफिक प्रहरीले जिल्लाको रेसुङ्गा नगरपालिका वडा नम्बर ४ को सेउघामा सडक प्रशिक्षण गरेको छ ।
प्रशिक्षणमा ट्राफिक प्रमुख काफ्ले आफै खटिएर सवारी चालकलाई गाडीको अघिल्लो सिटमा महिलाहरुलाई नराख्न र गाडी भित्रै फोहोर फ्याक्ने सामाग्री अनिवार्य रुपमा राख्न लगाएका छन् । ट्राफिक प्रहरीले ट्राफिक नियम नमान्नेलाई जरिमान मात्रै काटेर उम्कीन नदिने र दुईचारदिन सवारी साधनलाई नियन्त्रणमा लिएर कारवाही गरिने काफ्लेले बताए ।
एकछिनलाई ट्राफिक प्रहरीको आखा छलेर नियम बिपरित सवारी चलाएर दुर्घछटना गराएर कानुनले नछोडने हुँदा जिम्मेवार बन्न र कानुनी अबस्था बारेमा पनि जानकारी गराइएको थियो ।
उनले दुर्घटना न्यूनिकरण गर्नु ट्राफिक प्रहरीको लागि मात्रै सोच्नु गलत रहेको बताउदै सबै पक्ष उत्तिकै जिम्मेवार रहन प्रशिक्षण दिएका थिए । ट्राफिक प्रहरीले सडकमै चालक,सहचालक, यात्रुहरु र स्थानियलाई समेत राखेर दुर्घटना न्यूनिकरण जिम्मेवार नागरिक बनाउने उदेश्यले कार्यक्रम गर्दै आएको छ ।
जिल्लाको सदरमुकाम तम्घासबाट छुटने बिभिन्न सवारी साधनका चालक,सह–चालक, यात्रुहरुलाई राखेर दुर्घटना न्यूनिकरणमा जिम्मेवार नागरिक बनाउने प्रयास गरिएको जिल्ला ट्राफिक कार्यालय गुल्मीले जनाएको छ ।
बढ्दै गरेको सवारी दुर्घटनालाई न्यूनिकरणका लागि ट्राफिक प्रहरीले सडकमै चालकको स्वास्थ्य परिक्षण पनि गरेको थियो । दुर्घटना न्युनिकरण सम्बन्धमा ठाँऊको ठाँऊ सुधार भन्ने अभियानका साथ दुर्घटनाको कारक तत्वमा चालको स्वास्थ्य अबस्था पनि मुख्य रहेको भन्दै बिभिन्न सवारी चालकहरुको स्वस्थ्य परिक्षण गरिएको थियो ।
