बुटवल ।
प्रदेश नंं ५ सरकारका भौतिक पूर्वाधार विकास मन्त्री वैजनाथ चौधरीले पाल्पाका विभिन्न खानी क्षेत्रबाट बुटवलआउने टिप्परहरुलाई वैकल्पिक सडकको व्यवस्था गरि बुटवल बजारको सडकलाई सुरक्षित बनाउने तयारी गरिएको बताउनुभयो ।
बजारको मध्यभागबाटै निर्वाध रुपमा संचालन हुने टिप्परका कारण दिनहुं दुर्घटनाको जोखिम बढिरहेको भन्दै उहाले पाल्पाका विभिन्न खानी क्षेत्रबाट आउने टिप्परहरुलाई वैकल्पिक सडकको व्यवस्था गरि बजारको सडकलाई सुरक्षित बनाइ बुटवललाई टिप्परमुक्त शहर बनाउने तयारी गरिएको बताउनुभयो ।
सुरक्षित यात्रा अभियान नेपाल, बुटवल उपमहानगरपालिका, नेपाल अटो मोवाईल्स स्पोर्टस् एशोसिएसन लगायतका संघसंस्थाहरुको संयुक्त आयोजनामा बुटवलमा आयोजित प्रदेश स्तरिय सडक सुरक्षा सम्मेलनमा बोल्दै मन्त्री चौधरीले सडक सुरक्षाको विषयलाई प्रदेश सरकारले प्राथमिकता दिएको बताउनुभयो
मन्त्री चौधरीले पाल्पाका विभिन्न खानीबाट ढुंगा लगायतका वस्तु बोकि दैनिक ५ सयको संख्यामा टिप्परहरु बुटवल हुंदै आवतजावत गर्ने उल्लेख गर्दै अब ति टिप्परहरुलाई पाल्पाको झुम्सादेखि चरङगे हुंदै धागो कारखानामा आउने गरी चल्ने व्यवस्था मिलाईने बताउनुभयो ।
मन्त्री चौधरीले जनशक्ति अभावका कारण चालु वर्षको बजेट कार्यान्वयन हुन समस्या भएको उल्लेख गर्दै सडकलाई सुरक्षित बनाउन अप्ठ्यारो भएका मोडहरुलाई सुधार गर्न जरुरी रहेको बताउनुभयो ।
अबको पांच वर्षभित्र दुर्घटनाको संख्यालाई उल्लेख्य रुपमा घटाउने दावी गर्नुभयो । मन्त्री चौधरीले स्थानीय तहको वेवास्ताले टिप्परसंगै विद्युतिय रिक्सा र टेम्पोका कारण पनि बजार क्षेत्रमा दुर्घटना बढिरहेको भन्दै केहि दिनभित्रै विद्युतिय रिक्साको व्यवस्थापनमा कडाईका साथ लाग्ने बताउनुभयो ।
प्रदेशसभा सदस्य वैजनाथ जैसवालले दुर्घटना र दुर्घटनापछिको प्रतिघटनाका कारणहरुको बारेमा खोजी हुन जरुरी रहेको बताउनुभयो। उहाले यातायात क्षेत्रको सिण्डिकेट खारेज गरिएको भनिएपनि कार्यान्वयन हुन नसकेको भन्दै यातायात क्षेत्रको सुधारको लागि यातायात व्यवस्थापन समिति आवश्यक रहेको बताउनुभयो । बुटवल उपमहानगरपालिकाका प्रमुख शिवराज सुवेदीले स्थानीय, प्रदेश र संघ गरी तिनै तहको साझा सूचिमा रहेको सडकको निति र मापदण्ड प्रदेश सरकारले बनाउनुपर्ने बताउनुभयो ।
कार्यक्रममा सहभागिहरुले रोड सेफ्टी म्यानेजमेन्ट, रोड सेफ्टी अडिट, हाईवे र शहरी सडकको बर्गिकरण, सुरक्षित सवारीसाधन, सुरक्षित सडकको प्रयोग, निति निर्माण र त्यसको कार्यान्वयन लगायतका विषयमा ध्यान दिन सके दुर्घटना कम गर्न सकिने सुझाव दिएका थिए ।
