संयुक्त अरब इमिरेट्स ९ यूएई मा अर्घाखाँचीका गैरे सहित १२ जना नेपाली अलपत्र परेका छन् । साढे २ महिनादेखि तलब नपाएपछि उनीहरु अलपत्र परेका हुन ।
अलपत्र पर्नेमा अर्घाखाँचीका हरिप्रसाद गैरे, मोरङका सानु राई, सन्तोष गुरुङ र लालध्वज राई, काभ्रेका बोमबहादुर तामाङ, नवलपुरका गया चौधरी र सुनसरीका इन्द्रबहादुर महतो रहेका छन् ।
काठमाण्डौ महाराजगञ्जमा रहेको नेगी इन्टरनेशनल ओभरसिज म्यानपावरमार्फत यूएईको एटोन कन्ट्र्याक्टिङ मेन्टिनेन्स् कम्पनीमा आएका उनीहरुलाई तलब नपाएपछि खाना र बस्न पनि समस्या परेको छ ।
आबुधाबीको मुसाफा ८ नम्बर मजदुर क्याम्पमा ७ जना र बाँकी ५ जना दुबईमा समस्यामा परेको छन् । मुसाफामा अलपत्र परेका ७ जनाले मंगलबार नेपाली दूतावास आबुधाबीमा पुगेर आफूहरु समस्यामा परेको र सहयोग गरिदिन भन्दै निवेदन समेत दिएका छन ।
पीडितहरुमध्ये कतिपयको मासिक तलब बाहेक ३ देखि ६ महिनासम्मको ओभरटाइमको हिसाबसमेत कम्पनीले नदिएको अर्घाखाँचीका हरिप्रसाद गैरेले दुखेसो गर्नुभयो ।
सोही कम्पनीमार्फत दुबईमा कार्यरत बाँकी ५ जना दूतावाससम्म आउने जाने पैसा नभएकाले निवेदन दिनसमेत आउन नसकेको पीडितमध्येका एक मोरङका शिशिर राईले बताउनुभयो ।
काम एउटै भए पनि म्यानपावरले नेपालमा गराएको सम्झौता अनुसार यहाँ तलब नपाएको पीडितहरुको गुनासो छ ।
एक हजार दिर्हाम न्युनतम तलब र खाना बापत २ सय दिर्हाम दिने भनेर यूएई ल्याएको भए पनि यहाँ आएर कम्पनीले ८ सय तलब र २ सय खाना बापतको सम्झौता गराएको थियो ।
तर पछिल्लो साढे दुई महिना यता तलब नपाएपछि अहिले उधारोमा सामान ल्याएर गुजारा गरिरहेको पीडित सानु राइले बताउनुभयो ।
तलब नपाएपछि दुई हप्तादेखि काममा नगएको पीडित ले बताएका छन । आफूहरुले पाउनुपर्ने रकम दिलाएर नेपाल फर्काउन दूतावासलाई अनुरोध गरेको पनि पीडितको भनाई छ ।
नेपाली कामदारको उजुरीका आधारमा दूतावासका श्रम काउन्सिलर भेषबहादुर कार्कीले कम्पनीको मानव संसाधन विभाग र म्यानपावरका प्रतिनिधिसँग टेलिफोन गरेर समस्या समाधान गर्न आग्रह गरिएको जानकारी दिनुभयो ।
कम्पनीले एक हप्तामा कामदारहरुले पाउनुपर्ने सम्पूर्ण सेवा सुविधा उपलब्ध गराउने प्रतिवद्धता दूतावाससँग गरेको छ ।
