२०७६ जेठ २ बिहीबार बुटवल ।
प्रदेश ५ को प्रदेश सभाको बजेट अधिवेशन आजदेखि सुरु हुँदै छ। अधिवेशन आज दिउसो एक बजेका लागि बोलाइएको छ ।
अधिवेशनको पहिलो बैठकमा सभामुख पूर्णबहादुर घर्तीमगरले मुख्यमन्त्री शंकर पोखरेलको सिफारिसमा प्रदेश प्रमुख उमाकान्त झाबाट संसद्को अधिवेशन आह्वानसम्बन्धी पत्र वाचन गरेर सुनाउनु हुने छ ।
प्रदेश नं ५ सरकारले आगामी आर्थिक वर्ष २०७६।०७७ का लागि बजेटको तयारी समेत थालिसकेको छ।
असार १ गतेभित्र बजेट पेश गर्नुपर्ने संवैधानिक व्यवस्था अनुसार प्रदेश सरकारले त्यसअघि नीति कार्यक्रम पेश गर्ने र बजेट पेश गर्ने तयारी थालेको हो।
प्रदेशसभाको हिउँदे अधिवेशन २३ विधेयक पारित गर्दै अघिल्लो आइतबार रातीदेखि अन्त्य भएको थियो ।
