बुटवल, जेठ–८ । जिल्ला कारागार गुल्मीका बन्दी महिलाहरुलाई गुल्मीको एक संस्थाले एक थान टेलिभिजन प्रदान गरेको छ । गुल्मीका प्रमुख जिल्ला अधिकारी यदुनाथ पौड्याल र जिल्ला कारागार प्रमुख अर्जुन थापाको बिशेष पहलमा गुल्मी यातायात ब्यवसायी संघले १७ ईञ्चको एलजी टेलिभिजन प्रदान गरेको हो ।
पुरुष बन्दीहरुलाई यस अघि अन्य संस्थाले उक्त सुविधा प्रदान गरि सकेको भए पनि त्यस कारागारमा रहेका चार जना बन्दी महिलाहरुले उक्त सुविधा पाउन सकेका थिएनन । टेलिभिजन हस्तान्तरण गर्र्दै प्रमुख जिल्ला अधिकारी पौड्यालले जो जहाँ बसे पनि ब्यक्तिगत मानव जिवन सबैको एउटै भएको बताए ।
उनले बन्दी महिलाहरुलाई भने –‘तपाईहरु कारागारको पर्खाल भित्र हुनुहुन्छ , हामी पनि जिम्मेवारीको कुनै न कुनै पर्खाल भित्र छौं’– ‘मानव जिवनको न्युतम सुविधाबाट तपाईहरु बञ्चित हुन नपरोस भनेर हामीले विभिन्न संघ संस्था संग समन्व्य गरेर केहि सुविधाहरु उपलब्ध गराउने पहलमा जुट्दै आएका छौं । ’
प्रजिअ पौड्यालले केहि महिना अघि सुईटर बुन्ने तालिम दिलाए पछि आफुहरुले सुईटर बुनेर केहि रकम कमाउन थालेको समेत बताए । उनीहरुले खुशी ब्यक्त गर्दै भन्दै थिए अब टिभि हेरेर बाहिरि संसार नियाल्न पनि पाईने भयो ।
हस्तान्तरण कार्यक्रममा जिल्ला प्रहरी प्रमुख एसपी दिपककुमार बस्नेत , कारागार प्रमुख थापा, नेपाल पत्रकार महासंघका अध्यक्ष नवराज भुसाल , गुल्मी यातायात ब्यवसायी संघका महासचिव हिमाल कुँवर , ब्यवस्थापक डोरबहादुर कुँवर लगायतको सहभागिता थियो ।
कारागार मर्मत सम्भार
प्रजिअ पौड्यालले प्रदेश सरकार र स्थानिय सरकार संग समेत समन्व्य गर्दै कारागारको मर्मत सम्भार भई रहेको बताए । जिर्ण र साँघुरो रहेको कारागार यति वेला रंङ्गरोवन गरेर चिटिक्क पारिएको छ । ट्रस बनाएर कार्यालय प्रमुखको कार्यालय र डिउटी पोष्ट निर्माण गरिएको छ ।
अब कारागार बाहिर पर्खाल निर्माण र सिसीटिभी जडान पनि गरिने उनले जानकारी दिए । भोली देखि पाँच दिने सिप विकास तालिम र मनोविज्ञान परामर्श समेत दिईने उनले बताए ।
