बुटवल
प्रदेश नम्बर ५ मा शुक्रबार नीति तथा कार्यक्रम आएपनि सांसदहरुले कुनै न रुपमा निवाचन क्षेत्रमा बजेट पाउनुपर्ने माग राखेका छन् ।
संघीय संसदको सिको गर्दै प्रदेश नम्बर ५ का सांसदहरुले कम्तीमा ५ करोडसम्मको बजेट संसद विकास कोषमार्फत खर्च गर्न पाउनुपर्ने माग गर्दै लबिङ गरिरहेका हुन।
संघीय संसदमा १० करोडको लबिङ हुँदै गर्दा प्रदेशका सांसदले पनि ५ करोड माग गरेका हुन् ।
प्रदेश ५ का सांसदले बजेट नहुँदा जनतासँग विकास निर्माणमा जोडिन नसकेको भन्दै निर्वाचन क्षेत्र विकास कार्यक्रमका लागि बजेट माग गर्दै आएका छन् । संसदीय दलको बैठकमै सत्ता र प्रतिपक्षी दलका सांसदले निर्वाचन क्षेत्र वा पूर्वाधार विकासका लागि बजेट छुट्याउन माग गरेको बताइएको छ ।
गत वर्ष पाँच नम्बर प्रदेशमा आयोजना दिने गरिएको थियो । तर अहिले घोषित रुपमै रकम दिनुपर्ने माग उठेको हो ।
निर्वाचन क्षेत्र विकासका लागि कम्तिमा ५ करोड चाहिने माग गरेका छन। प्रदेश सभा सदस्यलाई विकासको कामबाट बञ्चित गर्न खोजिएको भन्दै पैसा नदिँदा काम गर्न नसकिने बताए ।
गत वर्ष मुख्यमन्त्री शंकर पोखरेलले बजेट दिँदा त्यसको दुरुपयोग हुने भन्दै बजेट छुट्याएका थिएनन् । दबाब बढी नै आएपछि सांसदको सिफारिसमा ५०/५० लाख बराबरका दुईवटा योजना दिनेगरी बजेट दिएका थिए ।
जनता साना साना कामको लागि पनि प्रदेशसभा सदस्यकहाँ आउने भएकोले कुनै न कूनै रुपमा सम्वोधन गरिनुपर्ने बताए । आर्थिक मामिला मन्त्रालयको समेत जिम्मेवारी समालेका मुख्यमन्त्रीले भने सांसदले बजेट भन्दा आवश्यकताका आधारमा योजना माग गर्न सक्ने भन्दै आएका छन् । सांसदले नीति निर्माणमा ध्यान दिनुपर्ने र विकासमा सरकारले नै काम गर्ने बताउँदै आएका छन् ।
आफूहरुले कुनै पनि भूमिका नपाउँदा स्थानीय सरकारको वडाध्यक्ष भन्दा तल परेको सांसदहरुको गुनासो छ । अर्कोतिर भोट जनताले प्रत्यक्ष र समानुपतिक दुवैलाई राखेका हुन्छन् । तथर्स कोष निमाण गर्दा कुनैपनि विभेद गरिन नहुने सांसदहरुको भनाई छ।
प्रदेश ५ सरकारले असार १ गते बजेट सार्वजनिक गर्ने तयारी गरेको छ।
