काठमाडौ, जेष्ठ २५
प्रधानमन्त्री केपी शर्मा ओली आज बेलुका उच्चस्तरीय ३१ सदस्यीय टोलीको नेतृत्व गर्दै स्वीट्जरल्याण्ड जाने कार्यक्रम रहेको छ । प्रधानमन्त्री ओली दोस्रो पटक सरकारको नेतृत्व गरेपछि स्वीट्जरल्याण्डको भ्रमणमा निस्कन लाग्नुभएको हो ।
भ्रमणमा प्रधानमन्त्री ओलीले सोमबार अन्तराष्ट्रिय श्रम संगठन एक सय वर्ष पुगेको अवसरमा जेनेभामा आयोजना हुने कार्यक्रमलाई संवोधन गर्नुहुनेछ । त्यसपछि उहाँले स्वीस इन्टेरियर मिनिस्टर एवंम् पूर्व राष्ट्रपति अलिन ब्रेसेटसँग दुई पक्षीय वार्ता गर्ने कार्यक्रम रहेको छ ।
परराष्ट्र मन्त्रालयका अनुसार प्रधानमन्त्री ओलीले जेनेभास्थित नेपाली समुदायसँग पनि भेट गर्नुहुनेछ ।
प्रधानमन्त्रीको टोलीमा उहाँको पत्नी राधिका शाक्य, परराष्ट्रमन्त्री प्रदीप ज्ञवाली, श्रम, रोजगार तथा सामाजिक सुरक्षामन्त्री गोकर्ण विष्ट, परराष्ट्र सचिव शंकरदास वैरागी, श्रम सचिव महेश दाहाल, प्रधानमन्त्रीका राजनीतिक सल्लाहाकार र वैदेशिक सल्लाहाकार राजन भट्टराई लगायत सहभागि हुने बताईएको छ ।
