धरान
डेंगु रोग नियन्त्रणमा आउन नसकेपछि स्वास्थ्य कार्यालय सुनसरीले धरानलाई डेंगु रोग प्रकोप क्षेत्र घोषणा गरेको छ।
प्रदेश स्वास्थ्य निर्देशनालयको निर्देशनमा स्वास्थ्य कार्यालयले बुधबार धरानलाई डेंगु रोग प्रकोप क्षेत्र घोषणा गरेको हो।
डेंगु ज्वरोको बिरामी देखिएको महिना दिन पुग्न लाग्दा पनि नियन्त्रणमा आउनुको साटो संख्या बढ्दै गएपछि निर्देशनालयले यस्तो निर्देशन दिएको थियो।
प्रदेश निर्देशनालयको निर्देशन आएकोले धरानलाई डेंगु रोग प्रकोप क्षेत्र घोषणा गरेर सम्बन्धित निकायहरूमा पत्राचार गरिसकेका छौं,’स्वास्थ्य कार्यालय सुनसरीका प्रमुख सागर प्रसाईंले भने,अब स्वास्थ्य संस्थाहरूले विश्व स्वास्थ्य संगठन डब्लुएचओ को गाइडलाइन अनुसार उपचार गर्नुपर्छ। केन्द्रीय सरकारले पनि विशेष ध्यान दिनुपर्छ।’
चिकित्सकहरूका अनुसार सरकारी निकायले नै धरानलाई प्रकोप क्षेत्र घोषणा गरेकोले अब विश्व स्वास्थ्य संगठनको मापदण्डअनुसार उपचार हुन्छ।
अब धरानमा डेंगुको बिरामीको लागि कीटको आवश्यकता पर्दैन। उच्च ज्वरो आएको भए र अन्य एक वा दुई लक्षण मिल्यो भने त्यसैको आधारमा डेंगु पोजेटिभ निक्यौल गरेर उपचार गरिने यापिड रेस्पोन्स टिमका संयोजक डा विजयराज खनालले बताए।
डेंगु नियन्त्रणबाहिर भएर प्रकोप क्षेत्र नै घोषणा भएकोले परीक्षण गरिरहनु पर्दैन, अब लक्षण देखिनासाथ डेंगुको उपचार गरिन्छ,’डा।खनालले भने,‘यसले बिरामी, अस्पताललाई सहज हुन्छ। कीट आवश्यक पर्दैन।’
चिकित्सकहरूका अनुसार धरान प्रकोप क्षेत्र घोषणा भएकोले उच्च ज्वरो आएको र अन्य एक वा दुई सहायक लक्षण भए सिधै डेंगु पोजेटिभ भनेर उपचार गर्नुपर्छ। कीटबाट डेंगु परीक्षण गर्नु आवश्यक नभए पनि रगतको प्लेटलेट, डब्लुबिसी र पिसिबीको टेष्ट भने रगतबाट गर्नुपर्ने डा खनालले बताए।
यो तीन वटा जाँचका लागि कीट चाहिँदैन, रगतबाट हुन्छ। यसले कीटमा लाग्ने खर्च पनि जोगिन्छ। त्यो पनि केस हेरेर गर्नुपर्छ,’उनले भने।
प्रदेश स्वास्थ्य निर्देशनालयका अनुसार डेंगु रोगबारे धरानको पछिल्लो ३ वर्षको तथ्यांक हेरेर डेंगु रोग प्रकोप क्षेत्र घोषणा गरिएको हो।
