अनिल खत्री
३१ जेठ, गुल्मी – गुल्मीमा उउटा बिद्यालयमा रोलनम्बर १३ सुन्दा पनि मानिस झस्किन्छन । सुन्दा अचम्म लाग्न पनि सक्छ । तर जिल्लाको एउटा विद्यालयमा झण्डै ५ दशकदेखि एउटा रोल नम्बर १३ नराखि बिद्यार्थीको हाजिरी गरिर्दै आएको छ ।
जिल्ला सदरमुकाम तम्घासको महेन्द्र माध्यमिक विद्यालयको कक्षा ९ मा रोल नम्बर १३ नलेखेको अहिले ४४ वर्ष वढि पुगेको छ ।
विद्यालयको कक्षा ९ मा पढ्ने विद्यार्थीहरूले रोल नम्बर १३ सुनेका छैनन् । विद्यार्थीहरू मात्र होइन, शिक्षकहरू पनि रोल नम्बर १३ बाट निकै टाढा छन् ।
विद्यालयमा भर्ना भई कक्षा ९ मा अध्ययन गर्ने १३ रोल नम्बर भएका बालबालिकाको विभिन्न समयमा मृत्यु भएका कारणले विद्यालयले नै रोल नम्बर १३ लेख्न छोडेको हो ।
विद्यालयका सहायकप्राचार्य युवराज ज्ञवालीका अनुसार विद्यालयको कक्षा ९ मा १३ रोल नम्बर भएका तत्कालिन अर्खले गाबिस ७ भण्डारी टोलका ढुण्डीराज भण्डारीको २०२५ सालमा परिक्षा दिने क्रममा पेट दुखेर मृत्यु भएको थियो ।
त्यस्तै दोस्रो पटक २०३० सालमा तत्कालिन तम्घास गाबिस ४ का जुनप्रसाद श्रेष्ठको २०३१ सालमा तत्कालिन तम्घास गाबिस १ रमेश श्रेष्ठको मृत्यु भएको थियो । २०३२ तम्घास पुरानोबजारका कृष्णप्रसाद पाण्डेयको विद्यालयमै परेको चट्याङ लागेर मृत्यु भएको थियो ।
अप्रिय घटना घटेका कारण अहिले पनि घटना हुन्छ की भन्ने डरले १३ रोल्नम्बर नलेखिएको बिद्यालय व्यवस्थापन समितिका सदस्य घनश्याम पाण्डेयले बताए । लगातार ४ जना बिद्यार्थीको १३ रोल नम्बर भएका मृत्यु भएको र बिद्यार्थीहरुले पनि १३ रोल नम्बर राख्न नचाहेका कारण बिगत देखि यसलाई निरन्तरता दिँदै आएको पाण्डेयले बताए ।
कक्षा ९ को रोल नं १३ सधैं खाली हुन्छ सो कक्षामा रोल नम्बर १२ पछि एकैपटक १४ आउँछ । २००९ सालमा स्थापना भएको बिद्यालय हाल उक्त बिद्यालयमा १२ कक्षासम्म पढनपाठन हुँदै आएको छ ।
बिज्ञान, शिक्षा बिज्ञान, मानबिकी, व्यवस्थापन १२ सय वढि बिद्यार्थीहरु पठन पाठन गर्दै आएको बिद्यालयले जनाएको छ । जिल्लाकै सामुदायिक बिद्यालयमा उत्कृष्ट बिद्यालयमा परिचित छ । बिद्यालय नमुना बिद्यालयको रुपमा छनोट समेत भएको छ ।
