पाल्पा ,जेष्ठ ३२
पाल्पामा जंगली च्याउ खाएर बिरामी परेकामध्ये ६ जनाको मृत्यु भएको छ । पाल्पाको निस्दी गाउँपालिकामा जंगली च्याउ खाएर बिरामी परेकामध्ये ६ जनाको मृत्यु भएको हो ।
जंगली विषालु च्याउको तरकारी पकाएर खाएकामध्ये निरुता सिं ठकुरी ,निस्दी– ३ सार्की डाँडाका नौ वर्षीया निर्मला सिं ठुकरी, सात वर्षीय सुमन सिं ठकुरी, चार वर्षीय विष्णु सिं ठकुरी, निशा सिं ठकुरी र ४५ वर्षीय पुरन खाम्चाको निधन भएको संघीय सांसद दलबहादुर रानाले जानकारी दिनुभयो ।
गत शुक्रबार जंगली च्याउ खाएर उनिहरु बिरामी भएका थिए । नजीकैको जङ्गलबाट खोजेर ल्याइएको च्याउ पकाएर खाएका सार्कीडाँडाका ११ जना बिरामी परेका थिए ।
बिरामीमध्ये निर्मलाको मध्यविन्दु अस्पताल नवलपरासी विष्णुको पुरानो मेडिकल कलेज भरतपुर तथा अन्यको काठमाडौंका विभिन्न अस्पतालमा निधन भएको हो ।
बिरामीहरुको नवलपरासीको मध्यविन्दु अस्पताल, मनकामना अस्पताल तथा पुरानो मेडिकल कलेज भरतपुर, त्रिभुवन विश्वविद्यालय शिक्षण अस्पताल महाराजगञ्ज काठमाडौंलगायत विभिन्न अस्पतालमा उपचार भइरहेको छ ।
बिरामी ८० वर्षीय प्रेम सिं ठकुरी उपचारपछि घर फर्केका छन् । अन्य बिरामी ३६ वर्षीया चनकुमारी खाम्चा, उनकी छोरी १५ वर्षीया विमला, ३० वर्षीया दानमाया सिं ठकुरी र धनकुमारी सिंको सघन उपचार कक्षमा उपचार भइरहेको छ ।
पाल्पा सदरमुकाम तानसेनदेखि करीब ७० किमी पूर्व सार्कीडाडाँका विकटका चार परिवारका सदस्य बिरामी परेका हुन् ।
