बुटवल ,
असार ८ –
बुटवलमा ‘एक वन एक पोखरी निर्माण’ अभियान सुरु गरिएको छ ।
पर्यावरण जोगाउन भन्दै यस्तो अभियान सुरु गरिएको हो । बुटवलमा २० वटा सामुदायिक वन छन् । यीमध्ये हालसम्म चारपाला, शिवनगर, बुटवल, चुरे, जितेश्वरी, रामनगर र तिनाउखोला नियन्त्रण गरी सातवटा सामुदायिक वनमा पोखरी निर्माण भइसकेको छ ।
बाँकी वन क्षेत्रमा थप अध्ययनपछि अर्को वर्ष पोखरी निर्माण गरिने उपमहानगरपालिकाको भनाइ छ ।
चुरे पहाड र यसको फेदीमा रहेका सामुदायिक वनहरुमा पोखरी निर्माण सुरु गरिएको बुटवल उपमहानगरपालिकाका प्रमुख शिवराज सुवेदीले जानकारी दिनुभएको छ ।
चुरे क्षेत्रमा पोखरी निर्माण गरी चुरेभन्दा तल्लो क्षेत्रको पानीको मूलमा सुधार ल्याउने उहाँको भनाइ छ ।
यी सबै वनमा पोखरी निर्माणका लागि उपमहानगरले चालु आर्थिक वर्षमा २८ लाख रुपैयाँ बजेट विनियोजन गरेको छ ।