असार १० –
पाल्पामा सिलिन्डर बम विस्फोट भएको छ । पाल्पाको रामपुर नगरपालिका ७ किसानबारी मा सिलिन्डर बम विस्फोट भएको हो ।
सहिद बहुमुखी क्याम्पसको उत्तरी क्षेत्रको जङ्गलमा बम विस्फोट भएको जिल्ला प्रहरी कार्यालय पाल्पाले जनाएको छ ।
गए राति करिब १० बजेको समयमा बम बिस्फोट भएको जिल्ला प्रहरी प्रमुख एसपी विश्वमणी पोखरेलले बताउनुभयो ।
बम पड्काउनेको खोजी कार्य जारी रहेको प्रहरीले जनाएको छ ।
यस्तै अर्घाखाँचीमा तीन ठाउमा बम फेला परेको छ । आजको नेपाल बन्दलाइ लक्षित गरेर बम राखिएको आशंका गरिएको छ ।
छत्रदेव गाँउपालिका वडा नम्वर ५ को वडा कार्यालय नजिकै, वडा कार्यालय ७ को नजिकै र मालारानी ९१ को छेडाठाटीमा गरि तीन ठाउमा बम जस्तो देखिने संकास्पद बस्तु फेला परेको प्रमुख जिल्ला अधिकारी प्रेमलाल लामीछानेले जानकारी दिए ।
बम हो या संकास्पद बस्तु भन्नेबारेमा अनुसन्धान पछि मात्र थाहा हुने प्रजिअ लामीछानेको भनाइ छ ।
संकास्पद बस्तुलाइ डिस्पोजल गर्न नेपाली सेनाको टोली बम भएको स्थानमा गएर डिस्पोजल गर्ने तयारी गरि रहेको प्रहरीले जनाएको छ ।
बन्दका कारण जिल्लाभरको जनजीवन प्रभावित रहेको छ । विहानै देखि छोटो तथा लामो दुरीका सवारी साधन चलेका छैनन । शिक्षण सस्था विद्यालय सबै ठप्प छन ।
यता गुल्मीमा भने कुनै अप्रिय घटना घटेको छैन तर छोटो तथा लामो दुरीका सवारीसाधन नचल्दा यात्रुहरुले सास्ती खेप्न बाध्य भएका छन ।
यता, बाग्लुङ नगरपालिका वडा नम्बर २ श्रीनगर टोलमा शंकास्पद वस्तु फेला परेको छ ।
शंकास्पद वस्तु नेपाली सेनाको डिस्पोजल टोलीले डिस्पोज गरेको छ ।
यस्तै बिप्लव नेतृत्वको नेकपाले आज आब्हान गरेको नेपाल बन्दको बुटवल, भैरहवा सहित आसपासका क्षेत्रमा बिहानैदेखि प्रभाव परेको छ ।
सरकारले बिप्लव नेतृत्वको पार्टीलाई प्रतिबन्ध लगाएकाले सडक बन्द गराउन पार्टीका नेता तथा कार्यकर्ता कतै नदेखिएपनि सार्वजनिक यातायात चलेका छैनन् ।
बुटवल, भैरहवा, परासी, तौलीहवा लगायतका अन्य स्थानबाट छोटो तथा लामो दुरीका गाडी छुटेका छैनन ।फाटफुट रुपमा निजी दुईपाङग्रे गाडी र अटो तथा इरिक्सा मात्रै सडकमा चलेका छन् ।
बिहानी समयमा सञ्चालन हुने शिक्षण सस्थाहरु पनि सञ्चालन भएका छैनन ।
यस्तै पूर्वी नवलपरासीको कावासोती नगरपालिकाका उपमेयर प्रेमशंकर मर्दनियाको गाडीमा अज्ञात समूहले आगजनी गरेको छ ।
लु १ झ ३२१ नम्बरको स्कार्पियोमाथि अज्ञात समूहले गएराति आगजनी गरेको जिल्ला प्रहरी कार्यालय, नवलपरासी बर्दघाट सुस्ता पूर्वले जनाएको छ ।
प्रहरीले घटनास्थलबाट विप्लव समूहको पर्चा भेटेको छ ।
यही आधारमा प्रहरीले आगजनीमा विप्लव समूह संलग्न रहेको अनुमान गरेको छ ।