गुल्मी ,
असार १० –
गुल्मीको इस्मा गाउँपालिकाले आर्थिक बर्ष २०७६ ७७ को बजेट तथा कार्यक्रम प्रस्तुत गरेको छ ।
गाउँपालिका उपाध्यक्ष बिमला खत्रीले ३३ करोड ५५ लाख ५२ हजारको बजेट गाउँसभामा पेश गर्नुभएको हो ।
सडक पुग्न नसकेका वस्तीहरुमा यसै वर्ष भित्र सडक पु¥र्याउनका लागि १ करोड ९० लाख ७५ हजार विनियोजन गरिएको छ ।
विद्युतिकरणको लागि ५ लाख विनियोजन गरेको छ ।
इस्मा गाउँपालिकाले कृषिको विकासका लागि ‘समृद्ध इस्माको आवश्यकताः कृषि र पशुपालनमा व्यवसायिकता’ भन्ने कार्यक्रमलाई निरन्तरता दिएको छ ।
यसअन्तरगत उत्पादनमा आधारित अनुदान, पशु बीमाको लागि कृषकको बीमा प्रिमियममा ५० प्रतिशत गाउँपालिकाले अनुदान दिइने गरी बजेट विनियोजन गरिएको छ ।
्त्यस्तै घर घरमा कृषि तथा पशु प्राविधिक सेवा उपलब्ध गराउने, कृत्रिम गर्भाधान प्रोत्साहन, तरकारी, फलफुल, कफी, मासु दुध, उत्पादनलाई पकेट र ब्लक बनाइ व्यवस्थित रुपमा सञ्चालन गरिने भएको छ ।
जसको लागि १ करोड ३ लाख विनियोजन गरिएको छ ।
यस्तै गाउँपालिकाले स्वास्थ्य संस्थामा सुत्केरी हुने आमाहरुलाई निःशुल्क एम्बुलेन्स सेवा प्रदान गर्ने भएको छ ।
यसैबिच गाउँपालिकाले विभिन्न गौरवका आयोजना सम्पन्न गर्न १ करोड ९५ लाख विनियोजन गरिएको छ ।
त्यस्तै पूर्ण सरसफाइ उन्मुख गाउँपालिका निर्माण गर्न सचेतनामूलक कार्यक्रम अवलम्बन गरिने भएको छ ।
सहकारी क्षेत्रको विकासका लागि आठ लाख विनियोजन गरेको छ । इस्मा गाउँपालिकाले वडा नम्बर २ हस्तिचौरमा होमस्टे सञ्चालन गर्ने भएको छ ।
त्यस्तै धार्मिक महत्व बोकेको इस्माकोट दरबार सहित माइकास्थान, देउरालीलगायतका क्षेत्रको विकास र प्रचारका लागि ६० लाख विनियोजन गरिएको छ ।
गाउँपालिकाले समग्र शिक्षाको विकासको लागि एक करोड ५० लाख विनियोजन गरेको छ ।
इस्मा गाउँपालिकाले प्रत्येक वडामा एक खेलमैदान निर्माण गर्ने, गाउँपालिका स्तरिय अध्यक्ष कप खेलकुद प्रतियोगिता सञ्चालन गर्नेलगायतका कार्यका लागि १० लाख विनियोजन गरेको छ ।
यस्तै खरका छाना विस्थापन गरी टिनका छाना लगाउने कार्यअन्तरगत वडा नं १ र ६ लाई खरका छानामुक्त गरिएको छ ।
बाँकि वडाहरुलाई आगामी बर्ष नै खरका छानामुक्त गराउनको लागि १० लाख विनियोजन गरिएको छ ।
समग्रमा इस्मा गाउँपालिकाकोे बजेटले कृषि तथा पशु, खानेपानी, खरका छाना विस्थापन, स्वास्थ्य तथा भौतिक पूर्वाधार लगायतका क्षेत्रले प्राथमिकता दिएको छ ।
