बाग्लुङ –
असार १३ –
बाग्लुङ मा जिप दुर्घटना हुदा एक जनाको ज्यान गएको छ ।
बरेङ गाउँपालिका वडा नम्बर–२, हुग्दिशिर, सुदलामा शनिबार बिहान जिप दुर्घटना भएको हो ।
रोकिराखेको जिप एक्कासि गुडेर सडक किनारमा पल्टिएको थियो ।
मृत्यु हुनेमा बरेङ गाउँपालिका–३, नयाँबजारकी ७५ वर्षीया विष्णुमाया खत्री रहेको प्रहरीले जनाएको छ ।
बाटाकाचौरको नयाँबजारदेखि बागलुङ सदरमुकामका लागि छुटेको ध१ज ४९१ नम्बरको जिप दुघटना भएको हो ।
जिप सुदलाचोकमा रोकी राखेर चालक हिरा काउचा यात्री बोलाउन गएको अवस्थामा एक्कासि जिप गुडेपछि अत्तालिएर जिपबाट हामफाल्दा खत्रीको छातीमा चोट लागेको थियो ।
घाइते खत्रीलाई उपचारका लागि पाल्पा लैजाँदै गर्दा बाटोमा मृत्यु भएको बताइएको छ ।
दुर्घटनामा हुग्दिशिर, बाझाडीकी डेढ वर्षीया टेरिसा परियार घाइते भएकी छन् । उनलाई उपचारका लागि पाल्पा पठाइएको छ ।
जिपमा चारजना यात्रु सवार थिए । अरु यात्रुको अवस्था सामान्य रहेको जनाइएको छ ।
यस्तै दाङमा जिप दुर्घटना हुँदा एक जनाको मृत्यु भएको छ।
दंगी शरण बाट तुलसीपुरको लागि छुटेको रा१ज ४३६ नम्बरको जिप दंगीशरण ७ श्रीगाउँ नजिक शनिबार बिहान साढे ८ बजेतिर दुर्घटना भएको थियो ।
दुर्घटनामा जिप चालक सोही ठाउँका डिल्ली बहादुर ओलीको मृत्यु भएको इलाका प्रहरी कार्यालय तुलसीपुरले जानकारी दिएको छ।
जिप अनियन्त्रित भई दुर्घटना हुँदा ओली गम्भीर घाइते भएका थिए ।
गम्भीर घाइते ओलीको राप्ती प्रादेशिक अस्पताल तुलसीपुरमा उपचारको क्रममा मृत्यु भएको इलाका प्रहरी कार्यालय तुलसीपुरका प्रहरी नायब उपरीक्षक प्रेमबहादुर शाहीले जानकारी दिनुभयो ।
यस्तै रामेछापमा दुर्घटनामा परी एक जनाको मृत्यु भएको छ।
लिखु तामाकोशी गाउँपालिका–१ दुरागाउँको गुरुवाङ्गमा जिप दुर्घटनामा परी जिप चालक क्याल्वु तामाङको घटनास्थलमै मृत्यु भएको जिल्ला प्रहरी कार्यालय रामेछापका प्रहरी नायब उपरीक्षक सन्तोषकुमार भट्टराईले जानकारी दिनुभयो ।
शनिबार बिहान ना ४ च ६२०५ नम्वरको जिप दुर्घटनामा परेको थियो ।
दुर्घटनामा परी वडा नम्बर १ का अध्यक्ष निङमार तामाङ घाइते भएका छन्। उनको दुरागाउँस्थित स्वास्थ्य चौकीमा उपचार भइरहेको बताइएको छ।
