काठमाडौ ,
असार २१ –
प्रहरीको सर्वाधिक खोजी सूचीमा रहेका फरार अभियुक्त बादशाह भनी चिनिने नसिम खान पक्राउ परेका छन ।
जिल्ला प्रहरी कार्यालय कपिलवस्तुको समन्वयमा केन्द्रीय अनुसन्धान ब्यूरोले शनिबार बिहान काठमाण्डौबाट पक्राउ गरेको हो ।
मायादेवी गाउँपालिका ४ पिपरा गाउँका नसिम खानमाथि जिल्लामा झण्डै एक दर्जन हत्या, आतंक, लुटपाट, अपहरण लगायतका मुद्दाहरु दर्ता गरिएका छन् ।
पक्राउ परेका खान प्रहरीबाट बच्नका लागि कपिलवस्तुको सीमावर्ती भारतीय बजार अलीगढवामा आफ्नै निजी घर बनाई बस्दै आएका थिए ।
सीमावर्ती भारतीय बजार अलीगढवाबाटै कपिलवस्तु जिल्ला भर खानले आफ्नो प्रभाव जमाउँदै आएका थिए ।
फरार सूचीमा रहेका खानमाथि सात वटा कर्तव्य ज्यान र एउटा डाँका मुद्दा दर्ता रहेको छ ।
उनीमाथि पछिल्लो पटक २०७४ साल वैशाख १३ गते मायादेवी गाउँपालिका९४ का वडा अध्यक्ष फतेह मोहम्मदको ५ वर्षीय छोरा मोहम्मद अयमान मुसलमानको अपहरणपछि हत्या गरेको किटानी जाहेरीबाट जिल्ला प्रहरी कार्यालयमा कर्तव्य ज्यान मुद्दा दर्ता गरिएको थियो ।
विगतमा विभिन्न सशस्त्र समूहमा रहेर घटना घटाएका खाँन तराईका सशस्त्र समूहसँग राज्यले गरेको वार्ताका पहलमा हतियार बुझाएर सार्वजनिक भएका थिए।
उनकी श्रीमती फौजिया नसिम खाँन नेकपावाट प्रदेश ५ का समानुपातिक सांसद बनेपछि उनी सरकारसँग विभिन्न पहल अघि बढाउँदै शान्तिपूर्ण राजनीतिमा आउने निरन्तर प्रयास जारी राखेका थिए।
फलस्वरूप विभिन्न माध्यम लगाएर शान्ति प्रकृयामा आउने पहलकै लागि राजनधानीमा पुगेका बखत एक होटलबाट नसिम पक्राउ परेको उनको पारिवारिक श्रोतले जनाएको छ।
तर उनीमाथि विभिन्न जघन्य अपराधका मुद्दा दर्ता भएको र ती मुद्दाको सिलसिलामा प्रहरीले पुनः पक्राउ गर्ने संकेत पाएपछि उनी ३ वर्षअघि एक सार्वजनिक कार्यक्रममा प्रहरी उपरीक्षक र प्रजिअकै सामुन्नेबाट स्थानीय नागरिकको घेरावन्दीमा पुनः फरार भएका थिए।
कपिलवस्तु प्रहरीले मोष्टवान्टेड सूचीमा राखेका नसिम काठमाडौंमा १० दिनदेखि बस्दै आएका थिए।
