असार २२,
काठमाडौ –
नेपाली कांग्रेसको केन्द्रीय कार्यसमितिको बैठकमा विभिन्न १४ वटा एजेन्डा पेश गरिएको छ ।
आइतबार ढिलो गरी सुरु भएको बैठकमा महामन्त्री पूर्णबहादुर खड्काले ती एजेण्डा पेश गरेका हुन् ।
आइतबार दिउँसो २ बजेका लागि बोलाइएको बैठक आन्तरिक विवादका कारण सुरु हुन ढिलाई भएको थियो ।
झण्डै पाँच घण्टा ढिला गरी साँझ पौने आठ बजेबाट बैठक सुरु भएको कांग्रेस प्रवक्ता विश्वप्रकास शर्माले जानकारी दिनुभयो ।
बैठकमा महामन्त्री पूर्णबहादुर खड्काले विभिन्न १४ वटा एजेण्डाहरु प्रस्तुत गर्नुभएको छ ।
विशेषगरी नियमावली संशोधन मस्यौदा समितिले तयार पारेको मस्यौदामाथिको छलफल, संघीय संरचना अनुसारका पार्टीको संगठनात्मक संरचना निर्माण लगायतका विषयमा छलफल भएको छ ।
यस्तै, जनसम्पर्क समिति, स्थानीय तहमा पार्टीका तर्फबाट निर्वाचित जनप्रतिनिधिहरुलाई नीतिगत निर्देशन गर्ने सम्बन्धमा, देशको समसामयिक राजनीतिक विषयवस्तुका सन्दर्भ र विविध विषय पनि एजेण्डका रुपमा प्रस्तुत गरिएको छ ।
यसैगरी, नेपाली कांग्रेस र तत्कालिन नेपाल लोकतान्त्रिक फोरमका बीच पार्टी समायोजनका सन्दर्भमा भएका कामहरुको प्रगति प्रतिवेदन प्रस्तुत गरिने, भातृ एवं शुभेच्छुक संस्थाहरुको विधान संशोधन र मान्यता प्रदान गर्ने, पार्टी विधान अनुसार अवधि समाप्त भएका भातृ संघहरुका सम्वन्धमा छलफल गर्ने एजेण्डा रहेको छ ।
आइतबारकै बैठकमा महामन्त्री खड्काले एजेण्डा प्रस्तुत गरिसकेपछि नियमावली संशोधन मस्यौदा समितिका संयोजक रमेश लेखकले ‘नेपाली कांग्रेसको नियमावली, २०७६’ प्रस्तुत गरेका छन् ।
नियमावलीको मस्यौदा केन्द्रीय कार्यसमितिका पदाधिकारी एवं सदस्यहरुलाई वितरण गरी बैठक समापन भएको जनाइएको छ । नियमावलीको अध्ययन पश्चात २०७६ असार २७ गते अर्को बैठक बस्ने मुख्यसचिव कृष्णप्रसाद पौडेलले जनाए ।
यसअघि विभिन्न विषयमा देखिएको विवादका कारण बैठक बस्न ढिलो भएको थियो । शीर्ष नेताहरु समूहगत तथा छुट्टाछुट्टै छलफलमा जुटेर सहमति कायम गरेपछि बैठक सुरु भएको थियो ।
