काठमाडौ
असार २८
सत्तारुढ नेपाल कम्युनिष्ट पार्टी नेकपाले बाढी, पहिरो पीडितको उद्धार र राहतमा सक्रियता पूर्वक जुट्न नेता कार्यकर्तालाई निर्देशन दिएको छ ।
प्रधानमन्त्री केपी शर्मा ओली र पार्टी अध्यक्ष पुष्पकमल दाहाल प्रचण्डले आज संयुक्त विज्ञप्ति जारी गर्दै सबै तहका कमिटी, नेता कार्यकर्ता र जनसंगठनलाई उद्धार तथा राहतमा जुट्न निर्देशन दिनुभएको हो ।
विज्ञप्तिमा पीडितको उद्धार र राहत कार्यमा सरकारका तर्फबाट आवश्यक पहल भइरहेको पनि उल्लेख छ ।
अध्यक्षद्वय ओली र प्रचण्डले बाढी, पहिरो तथा डुबानबाट भएको मानवीय एवम् भौतिक क्षतिबाट आफूहरु दुःखी भएको उल्लेख गर्नुभएको छ ।
यसैबिच उपराष्ट्रपति नन्दबहादुर पुनले लगातारको वर्षाका कारण आएको बाढी र पहिरोबाट भएको मानवीय तथा भौतिक क्षतिले आफूलाई दुःखित र मर्माहत बनाएको जनाउनुभएको छ ।
आज एक वक्तव्य निकालेर उहाँले बाढी, पहिरो तथा डुबानबाट दर्जनौंको मृत्यु, बेपत्ता र घाइते हुनुका साथै हजारौँ नागरिक विस्थापित तथा यातायात अवरुद्ध हुँदा लाखौँ नागरिकको जनजीवन प्रभावित हुनु दुखद् भएको बताउनुभएको हो ।
बाढी, पहिरो तथा डुबानमा परी मृत्यु हुनेप्रति श्रद्धाञ्जली व्यक्त गर्दै उपराष्ट्रपतिले मृतकका परिवारजनमा समवेदना प्रकट गर्नुभएको छ । उहाँले घाइतेको शीघ्र स्वास्थ्य लाभको कामना समेत गर्नुभएको छ ।
यस्तै प्रदेश नम्बर २ सरकारले बाढी र डुबान प्रभावितका परिवारलाई आर्थिक राहत उपलब्ध गराउने भएको छ ।
प्रदेश सरकारले बाढीपहिरोका कारण मृतकका परिवारलाई तीन–तीन लाखका दरले राहत रकम उपलब्ध गराउने निर्णय गरेको हो ।
आज बसेको प्रदेश मन्त्रिपरिषद्को आकस्मिक बैठकले राहत र उद्धारलाई प्रभावकारी बनाउँदै मृतकका परिवारलाई राहत रकम उपलव्ध गराउने निर्णय गरेको छ ।
यसका साथै राहत तथा उद्धारका लागि प्रत्येक जिल्लाका विपद व्यवस्थापन समितिलाई तत्कालका लागि १०÷१० लाख रुपैयाँ उपलब्ध गराउने निर्णय मन्त्रिपरिषद्ले गरेको छ ।