काठमाडौ ,
साउन ५ –
मनसुनी न्यून चापिय रेखा नेपालको दक्षिणतिर भएता पनि बंगालको खाडीबाट प्रवेश गरेको जलवाष्पयुक्त हावा र स्थानीय वायुको प्रभावको कारण केहि स्थानहरुमा वर्षाको सम्भावना रहेको मौसम पूर्वानुमान महाशाखाले जनाएको छ ।
मनसुनी रेखा नेपालतिर सर्दै आएकाले केही दिन भारी वर्षा हुने मौसमविदले पूर्वानुमान गरेका छन् । त्यसको प्रभाव आइतबार त्यति धेरै नपरे पनि सोमबारबाट भने बढी देखिने छ ।
महाशाखाका अनुसार हाल देशको पुर्वी तथा पश्चिमी भू भागमा आंशिक देखि सामान्य बदली र मध्यमा आंशिक बदलीको अवस्था छ ।
पूर्वका थोरै स्थानहरुमा हल्का वर्षा भइरहेको छ ।
आज दिउँसो देशभर आंशिकदेखि सामान्य बदली रहि केहि स्थानहरुमा वर्षा हुने सम्भावना रहेको छ भने राति देशको पुर्वी भू भागमा सामान्य देखि पूर्ण बदली साथै मध्य र पश्चिमी भु – भागमा आंशिक देखि सामान्य बदली भइ देशका केहि स्थानहरूमा वर्षा हुने सम्भावना रहेको महाशाखाले जानकारी दिएको छ पूर्व र मध्यका एक दुई स्थानमा भारी वर्षाको सम्भावना देखिएको छ ।
यसअघि दक्षिणतिर सरेको यो रेखा बिस्तारै नेपालतिर सर्दै आएको छ । यो रेखा सोमबार नेपाल भित्रिने र मंगलबार भारी वर्षा हुने मौसमविदको भनाइ छ ।
भारी वर्षाका कारण पहाडी क्षेत्रमा पहिरो जाने र खोलाहरुमा जल सतह बढ्ने भएकाले सतर्कता अपनाउन मौसमविदले सुझाव दिएका छन् ।
